اے این ایف نے 73 لاکھ روپے مالیت کی منشیات ضبط کر لی، 5 ملزمان گرفتار

جمعرات 24 جولائی 2025 15:25

کراچی(اُردو پوائنٹ اخبارتازہ ترین - این این آئی۔ 24 جولائی2025ء)اینٹی نارکوٹکس فورس (اے این ایف)کا ملک کے مختلف شہروں میں منشیات سمگلنگ کے خلاف کریک ڈائون جاری ہے۔ترجمان اے این ایف کے مطابق 5 مختلف کارروائیوں کے دوران 73 لاکھ 34 ہزار روپے سے زائد مالیت کی 483.800 کلو گرام منشیات برآمد کر کے 5 ملزمان کو گرفتار کر لیا گیا۔

(جاری ہے)

حکام کے مطابق راولپنڈی کارگو آفس میں کراچی بھیجے جانے والے پارسل سے 2 کلو چرس اور 7 کلو مشکوک مواد برآمد ہوا جبکہ آر سی ڈی روڈ حب کے قریب گاڑی سے 24 کلو چرس برآمد کر کے 2 ملزمان گرفتار کر لئے گئے۔

آر سی ڈی روڈ حب کے قریب ایک اور کارروائی کے دوران گاڑی کے خفیہ خانوں سے 64.8 کلو چرس پکڑ کر ملزم کو حراست میں لے لیا گیا۔اس کے علاوہ آدم جی داد روڈ کراچی میں واقع گودام سے 384 کلو پوٹاشیم پرمینگینیٹ برآمد کر کے ملزم گرفتار کیا گیا، نیشنل ہائی وے حیدرآباد پر مسافر بس سے 2 کلو افیون برآمد کر کے ملزم کو زیر حراست لیا گیا۔ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔