ریجنل ڈائریکٹر صوبائی محتسب علی اکبر جاگیرانی کا جوڈیشل لاک اپ کا دورہ، قیدیوں سے ملاقات کی

لاڑکانہ (اُردو پوائنٹ اخبارتازہ ترین - اے پی پی۔ 24 جولائی2025ء) ریجنل ڈائریکٹر صوبائی محتسب لاڑکانہ علی اکبر جاگیرانی نے ضلع قمبر کے جوڈیشل لاک اپ کا دورہ کیا اور قیدیوں سے ملاقات کی۔ اس موقع پر قیدیوں نے وکیل نہ ہونے اور دیگر سہولیات کی کمی کے حوالے سے شکایات پیش کیں۔ ریجنل ڈائریکٹر نے فوری طور پر متعلقہ حکام کو ہدایت دی کہ جن قیدیوں کے وکیل موجود نہیں، ا نہیں سرکاری وکیل فراہم کیے جائیں اور قیدیوں کو پینے کا صاف پانی اور بہتر صفائی کے انتظامات یقینی بنائے جائیں۔

انہوں نے جوڈیشل لاک اپ کے لیے سولر سسٹم کی فراہمی کی بھی یقین دہانی کرائی۔ بریفنگ میں بتایا گیا کہ یہاں 2 بیرکیں ہیں جن میں 29 قیدی موجود ہیں، جنہیں دن میں تین وقت کھانا فراہم کیا جاتا ہے اور ہر 15 دن بعد ڈاکٹر کا معائنہ بھی ہوتا ہے۔

(جاری ہے)

بعد ازاں، ریجنل ڈائریکٹر نے مختیارکار آفس قمبر کا دورہ کیا اور عوامی مسائل سے متعلق معلومات حاصل کیں۔

انہوں نے مختیارکار اور متعلقہ عملے کو ہدایت دی کہ عوامی مسائل بغیر کسی تاخیر کے حل کیے جائیں اور شہریوں سے خوش اخلاقی سے پیش آیا جائے تاکہ انہیں کسی بھی قسم کی پریشانی نہ ہو۔ اس موقع پر مختیارکار قمبر سہراب علی شیخ نے بتایا کہ اب تمام ریکارڈ کمپیوٹرائزڈ اور اسکین شدہ ہے جس سے عوام کو کافی سہولت حاصل ہوئی ہے۔ ریجنل ڈائریکٹر نے دفتر کی خستہ حال عمارت کی شکایت کا بھی نوٹس لیا اور یقین دہانی کرائی کہ اس بارے میں وزیر اعلیٰ سندھ کو لکھا جائے گا۔

اس کے بعد، ریجنل ڈائریکٹر صوبائی محتسب لاڑکانہ علی اکبر جاگیرانی نے ڈسٹرکٹ اکائونٹس آفس قمبر میں کھلی کچہری منعقد کی، جہاں حاضر سروس، ریٹائرڈ اور فوت شدہ ملازمین کے ورثاءکی جانب سے تنخواہوں، جی پی فنڈ اور پنشن سے متعلق مسائل سنے گئے۔ اس موقع پر انہوں نے ڈسٹرکٹ اکائونٹس آفیسر کو ہدایت دی کہ تمام سرکاری، ریٹائرڈ اور فوت شدہ ملازمین کے جائز مسائل بغیر تاخیر کے حل کیے جائیں۔

کھلی کچہری میں ملازمین کی بقایاجات، جی پی فنڈ، پنشن اور کیسز کے متعلق احکامات جاری کرتے ہوئے کہا کہ اس حوالے سے فوری اقدامات کیے جائیں تاکہ مسائل جلد از جلد حل ہوں۔ انہوں نے کہا کہ اس ملاقات کا مقصد یہی ہے کہ سرکاری ملازمین کے مسائل کو ترجیحی بنیادوں پر حل کیا جائے اور انہیں فوری انصاف فراہم ہو۔اس موقع پر ڈسٹرکٹ اکاو ¿نٹس آفیسر قمبر عبدالرئوف سومرو نے بریفنگ دیتے ہوئے بتایا کہ سابقہ تمام کیسز نمٹا دیئے گئے ہیں، اب کچھ نئے کیسز زیر التواءہیں جن پر کام جاری ہے اور وہ بھی جلد مکمل کر لیے جائیں گے۔

آئی بی اے پاس پرائمری اساتذہ کے تھرڈ فیز کے چوتھے راوئونڈ کا ڈیٹا بھی موصول ہو چکا ہے جس پر کام جاری ہے۔ سسٹم کی خرابی کی وجہ سے کچھ رکاوٹیں درپیش ہیں، تاہم مجموعی طور پر کام وقت پر مکمل کیا جا رہا ہے۔ اگر کسی شہری کا کوئی جائز مسئلہ ہے تو وہ دفتر سے رجوع کرے، ان کے مسائل فوری طور پر حل کیے جائیں گے۔