ڈپٹی کمشنر قلات نے پودا لگا کر مون سون شجر کاری مہم کا باقاعدہ افتتاح کر دیا

ہفتہ 26 جولائی 2025 20:40

کوئٹہ (اُردو پوائنٹ اخبارتازہ ترین - اے پی پی۔ 26 جولائی2025ء) ڈپٹی کمشنر قلات کیپٹن (ریٹائرڈ ) جمیل احمد بلوچ نے پودا لگا کر مون سون شجر کاری مہم کا باقاعدہ افتتاح کر دیا ۔ ایس پی قلات شہزاد اکبر ، ڈویژنل فاریسٹ آفیسر علی اکبر بنگلزئی ، ڈپٹی ڈائریکٹر محکمہ حیوانات عبدالفتاح لانگو ، تحصیلدار قلات حاجی عبدالغفار لہڑی ، سپرنٹنڈنٹ فاریسٹ آفس محمدیعقوب ، اے پی ایس ڈپٹی کمشنر علی زہری ، رینج فاریسٹ آفیسر حبیب لہڑی ، ایس ڈی او وائلڈ لائف شیراحمدمینگل اور دیگر نے بھی پودالگا یا۔

ڈویژنل فاریسٹ آفیسر علی اکبر بنگلزئی نے ڈپٹی کمشنر کو مون سون کی شجرکاری کاری سے متعلق تفصیلی بریفنگ دیتے ہوئے کہا کہ محکمہ جنگلات کی جانب اس سال کے لیئے ضلع قلات میں 5000درخت لگائے جائیں گے جبکہ 15000 درخت تقسیم کیئے جائیں گے۔

(جاری ہے)

اس موقع پر ڈپٹی کمشنر قلات کیپٹن (ر) جمیل احمدبلوچ نے کہا کہ ماحول کو آلودگی سے بچانے کے لئے زیادہ سے زیادہ درخت لگانا ضروری ہے ، ہر شخص کم سے ایک درخت لگائے اور اس کارخیر میں اپنا حصہ ڈالے، تمام محکموں کے ذمہ داران اپنے دفاتر میں زیادہ سے زیادہ درخت لگائیں ، علاقہ معززین اور صحافی برادری عوام میں درختوں کی اہمیت اور افادیت سے متعلق شعور اجاگرکریں ، درخت لگا کر انکی حفاظت اور دیکھ بھال کو یقینی بنائیں ، شجر کاری مہم کو کامیاب بنانے کے لیئے ضلعی انتظامیہ قلات محکمہ جنگلات سے ہرممکن تعاون جاری رکھے گا۔