اسلام آباد فوڈ اتھارٹی کا چھاپہ؛ 25 من گدھوں کا گوشت اور 50 زندہ گدھے برآمد، غیرملکی گرفتار

اتوار 27 جولائی 2025 12:15

اسلام آباد(اُردو پوائنٹ اخبارتازہ ترین - این این آئی۔ 27 جولائی2025ء)اسلام آباد فوڈ اتھارٹی نے ترنول میں چھاپے کے دوران 50 سے زائد گدھے اور 25 من گدھے کا گوشت برآمد کرکے غیر ملکی شہری کوگرفتارکرلیا۔ اسلام آباد فوڈ اتھارٹی نے ڈپٹی ڈائریکٹر ڈاکٹر طاہرہ صدیق کی موجودگی میں ترنول میں بڑی کارروائی کرتے ہوئے بھاری مقدار میں گدھے کا گوشت اور درجنوں گدھے برآمد کرلیے۔

(جاری ہے)

ڈپٹی ڈائریکٹر اسلام آباد فوڈ اتھارٹی کے مطابق کارروائی کے دوان مجموعی طور پر 25 من گدھے کا گوشت اور50 سے زائد گدھے برآمد کیے گئے جبکہ موقع پر موجود ایک غیر ملکی شہری کو پولیس کے حوالے کر دیا گیا۔ڈپٹی ڈائریکٹر فوڈ اتھارٹی کے مطابق اس حوالے سے تفتیش کی جارہی ہے کہ گوشت کن کن علاقوں میں سپلائی کیا گیا ہے جبکہ گوشت کو غیر ملکی شہریوں کے کھانے کے لیے استعمال کرنے کی تحقیقات جاری ہیں۔فوڈ اتھارٹی نے ملوث افراد کے خلاف فی الفور اندراج مقدمہ کا حکم دے دیا جبکہ گوشت کو تلف کردیاگیا۔