ورلڈ چیمپئن شپ آف لیجنڈز: پاکستان چیمپئنز کیساتھ نہ کھیلنے والی بھارتی ٹیم مشکلات کا شکار

میچ منسوخ ہونے کے بعد اب پوائنٹس ٹیبل کی صورتحال دیکھتے ہوئے سوشل میڈیا صارفین انڈین ٹیم پر طنز کرتے دکھائی دے رہے ہیں

ذیشان مہتاب پیر 28 جولائی 2025 13:10

ورلڈ چیمپئن شپ آف لیجنڈز: پاکستان چیمپئنز کیساتھ نہ کھیلنے والی بھارتی ..

لاہور (اردو پوائنٹ تازہ ترین اخبار ۔ 28 جولائی 2025ء ) ورلڈ چیمپئن شپ آف لیجنڈز (ڈبلیو سی ایل) 2025ء میں انڈین چیمپئنز ٹیم کو سوشل میڈیا پر طنز کا سامنا کرنا پڑ رہا ہے۔

اتوار کے روز ڈبلیو سی ایل نے سوشل میڈیا پر لیگ میں حصہ لینے والی ٹیمز کا پوائنٹس ٹیبل شیئر کیا جس میں انڈین چیمپئنز فہرست کے آخر میں نظر آئے۔

واضح رہے انڈین ٹیم ٹورنامنٹ میں اب تک ایک میچ بھی نہیں جیت سکی اور ایک پوائنٹ وہ ہے جو انہیں پاکستان کے خلاف میچ نہ کھیلنے کی بنا پر ملا۔

چند روز قبل انڈین چیمپئنز نے پاکستان کے خلاف میچ کھیلنے سے انکار کیا تھا جس کی وجہ سے دونوں ٹیمز میں ایک ایک پوائنٹ برابر تقسیم کیا گیا۔

ای ایس پی این کرک انفو کے مطابق انڈین کھلاڑی شکھر دھون سمیت دیگر نے انڈیا اور پاکستان کے درمیان کشیدہ سیاسی تعلقات کے باعث میچ کھیلنے سے انکار کیا جس کے بعد ورلڈ چیمپئن شپ آف لیجنڈز نے معذرت کرتے ہوئے میچ منسوخ کیے جانے کا اعلان کیا تھا۔

(جاری ہے)

میچ منسوخ ہونے کے بعد پاکستان میں انڈین ٹیم کو ٹرول کیا گیا وہیں اب پوائنٹس ٹیبل کی صورتحال دیکھتے ہوئے سوشل میڈیا صارفین انڈین ٹیم پر طنز کرتے دکھائی دے رہے ہیں۔

ہرپریت نے لکھا کہ ’انڈین ٹیم اس کی حقدار ہے، انہوں نے پاکستان کے خلاف میچ نہیں کھیلا، بہت اچھا ہوا۔‘

اشر امجد نے کہا کہ ’انڈیا کو ایک پوائنٹ ملا وہ بھی پاکستان کی وجہ سے۔‘

منہاج نے کہا کہ ’انڈیا ایک میچ جیت سکتا تھا وہ بھی بائیکاٹ کر کے رُل گیا۔‘