Live Updates

پاک-بھارت میچ میں اسپورٹس مین اسپرٹ کی خلاف ورزی، پی سی بی کا آئی سی سی کو خط

پیر 15 ستمبر 2025 17:24

لاہور (اُردو پوائنٹ اخبارتازہ ترین - این این آئی۔ 15 ستمبر2025ء)پاکستان کرکٹ بورڈ (پی سی بی) نے ایشیاکپ 2025 میں پاک-بھارت میچ کے دوران اسپورٹس مین اسپرٹ کی خلاف ورزی پر آئی سی سی کو خط لکھ کر میچ ریفری کو ہٹانے کا مطالبہ کردیا۔تفصیلات کے مطابق پاکستان کرکٹ بورڈ نے انٹرنیشنل کرکٹ بورڈ (آئی سی سی) اور ایم سی سی کو خط لکھ دیا،پی سی بی کی جانب سے لکھے گئے خط میں موقف اپنایا گیا کہ پاکستان کے خلاف میچ کے دوران بھارت نے اسپورٹس مین اسپرٹ کی خلاف ورزی کی۔

خط میں پاکستان نے میچ ریفری اینڈی پائیکرافٹ کو ایشیا کپ سے ہٹانے کا مطالبہ کردیا ، پاکستان نے ایشیا کپ کے ٹورنامنٹ ڈائریکٹر کو بھی آگاہ کردیا۔اس سے قبل، چیئرمین پی سی بی و چیئرمین ایشین کرکٹ کونسل محسن نقوی نے سماجی رابطے کی ویب سائٹ ایکس پر ایک پوسٹ میں کہا تھا کہ کھیل میں سیاست کو گھسیٹنا اس کی اصل روح کے خلاف ہے، امید ہے آئندہ فتوحات تمام ٹیمیں وقار اور شائستگی کے ساتھ منائیں گی۔

(جاری ہے)

واضح رہے کہ گزشتہ روز ایشیا کپ میں پاکستان کو شکست دینے کے بعد بھارتی ٹیم نے اسپورٹس مین اسپرٹ کی خلاف ورزی کرتے ہوئے پاکستانی کھلاڑیوں سے مصافحہ نہیں کیا تھا۔ترجمان پاکستان ٹیم کے مطابق ٹاس کے وقت بھی میچ ریفری نے کپتانوں سے ہاتھ نہ ملانے کی درخواست کی تھی۔بعد ازاں پاکستانی کپتان سلمان علی آغا نے بھی بھارتی رویے کے خلاف اختتامی تقریب میں احتجاجاً شرکت نہیں کی۔

علاوہ ازیں، بھارتی کپتان سوریا کمار یادیو کھیل میں سیاست کو لے آئے، پاکستان کے خلاف جیت کو پہلگام واقعے کے نام کر دیا تھا۔پوسٹ میچ پریزنٹیشن میں سوریا کمار یادیو نے کرکٹ قوانین کی دھجیاں بکھیرتے ہوئیکہا تھا کہ جیت کو پہلگام واقعے کے نام کرتا ہوں، پاکستان کے خلاف بھارتی آرمی کے لیے ہماری طرف سے تحفہ ہے۔