سعودی عرب،کارکنوں کی میڈیکل انشورنس نہ کرانے پر 110 کمپنی مالکان کو2.5 ملین ریال جرمانہ

جمعہ 1 اگست 2025 11:35

ریاض (اُردو پوائنٹ اخبارتازہ ترین - اے پی پی۔ 01 اگست2025ء) سعودی عرب کی ہیلتھ انشورنس کونسل نے کارکنوں کے طبی بیمہ پالیسی قانون کی خلاف ورزی کرنے پر 110 کمپنی مالکان پر 2.5 ملین ریال جرمانہ عائد کر دیا ۔

(جاری ہے)

اردو نیوز کے مطابق ہیلتھ انشورنس کونسل کی جانب سے جاری بیان میں مزید کہا گیا ہے کہ جرمانے عائد کئے جانے سے قبل تمام اداروں کو نوٹس جاری کئےگئے تھے جس میں انہیں انتباہ کیا گیا تھا کہ کارکنوں کے بیمہ قوانین کی خلاف ورزی ریکارڈ کی گئی ہے جسے دی گئی مدت کے دوران حل کیا جائے۔

ہیلتھ کونسل نے کہا کہ کمپنیوں کو جاری کئے گئے نوٹس کی مدت ختم ہونے کے بعد ان پر جرمانے عائد کئے گئے جو قانون کے مطابق ہیں۔ واضح رہے کہ سعودی عرب میں ہیلتھ انشورنس قوانین کے مطابق آجر کے لئے لازمی ہے کہ وہ اپنے کارکن اور ان کے اہل خانہ کے لئے سالانہ بنیادوں پر میڈیکل انشورنس فراہم کرے تاکہ وہ اپنا ضروری علاج آسانی سے کروا سکیں۔