غزہ، اسرائیلی فورسز نے مزید 62 فلسطینیوں کو شہید کردیا

غزہ میں بھوک اور غذائی کمی کا شکار ہو کر 169 فلسطینی جاں بحق ہوچکے ہیں، وزارت صحت

اتوار 3 اگست 2025 15:15

غزہ (اُردو پوائنٹ اخبارتازہ ترین - این این آئی۔ 03 اگست2025ء)غزہ میں اسرائیلی فورسز کی کارروائیوں میں 62 فلسطینی شہید ہوگئے۔عرب میڈیا کے مطابق اسرائیلی افواج نے مختلف کارروائیوں میں 62 فلسطینیوں کو شہید کردیا، جن میں امداد کے منتظر 38 فلسطینی بھی شامل ہیں جو غزہ ہیومنیٹیرین فانڈیشن کے امدادی مراکز کے گردونواح میں گولیوں کا نشانہ بنے۔

(جاری ہے)

غزہ کی وزارتِ صحت نے بتایا کہ اکتوبر 2023 سے لے کر اب تک غزہ میں بھوک اور غذائی کمی کا شکار ہو کر 169 فلسطینی جاں بحق ہوچکے ہیں، جن میں 93 بچے بھی شامل ہیں۔

غزہ کی حکومت کے میڈیا آفس کی جانب سے جاری ہونے والے بیان میں کہا گیا ہے کہ گزشتہ روز غزہ انکلیو میں 36 امدادی ٹرک داخل ہوئے جو 600 ٹرکوں کی ضرورت کو ہرگز پورا نہیں کرسکتے۔اسرائیل نے عالمی دبائو پر فضا سے امدادی سامان گرانے کی اجازت دی ہے مگر اس حوالے سے اقوامِ متحدہ کی امدادی ایجنسی انروا نے بتایا ہے کہ فضائی راستے سے غزہ میں گرائی جانے والی امداد ناکافی ہے، انروا نے اسرائیل سے زمینی راستے سے امداد کی زیادہ فراہمی پر زور دیا ہے۔