سیالکوٹ،گوہد پور دوبئی چوک میں واٹر فلٹریشن پلانٹس کا افتتاح

اتوار 3 اگست 2025 20:20

سیالکوٹ (اُردو پوائنٹ اخبارتازہ ترین - اے پی پی۔ 03 اگست2025ء) رکن صوبائی اسمبلی محمد منشاء اللہ بٹ نے گوہد پور دوبئی چوک میں واٹر فلٹریشن پلانٹس کا افتتاح کیا۔ اس موقع پر ایک پروقار تقریب منعقد ہوئی جس میں مسلم لیگ ن کے رہنما چاچا اسلم، عمر ایوب، صدر یوسی گوہد پور میاں افضل، سمی خالق، عبد الحمید قاسم، چودھری سیف اللہ، شیخ ناصر، عدنان اکبر چودھری سمیت علاقہ بھر کی معزز شخصیات نے شرکت کی۔

(جاری ہے)

خطاب کرتے ہوئے ایم پی اے محمد منشاء اللہ بٹ نے کہا کہ صاف اور محفوظ پانی کی فراہمی حکومت پنجاب کی اولین ترجیح ہے، کیونکہ یہ انسانی صحت اور معاشرتی فلاح کے لیے بنیادی ضرورت ہے۔ انہوں نے کہا کہ واٹر فلٹریشن پلانٹس کا قیام وزیر اعلیٰ پنجاب کے ویژن کا عملی اظہار ہے جس کے تحت عوام کو ان کی دہلیز پر صاف پانی کی سہولت فراہم کی جا رہی ہے ۔ انہوں نے کہا کہ صاف پانی نہ صرف بیماریوں سے بچاؤ کا ذریعہ ہے بلکہ ایک صحت مند معاشرے کی تشکیل میں بھی اہم کردار ادا کرتا ہے۔