سربیا صدر 6 ستمبر کو چین کا دورہ کریں گے ، روسی صدر سے ممکنہ ملاقات کا امکان

پیر 4 اگست 2025 08:40

بلغراد (اُردو پوائنٹ اخبارتازہ ترین - اے پی پی۔ 04 اگست2025ء) سربیا کے صدر الیگزینڈر ووچچ نے کہا ہے کہ وہ ستمبر کے آغاز میں چین کے سرکاری دورے کے دوران روسی صدر ولادیمیر پیوٹن سے ملاقات کر سکتے ہیں۔ تاس کے مطابق الیگزینڈر ووچچ نےصحافیوں سے گفتگو کرتے ہوئے کہا کہ وہ یکم سے 6 ستمبر تک چین کے دورے پر جا رہے ہیں جہاں انہیں چینی صدر شی جن پنگ نے جنگ عظیم دوم میں جاپان کے خلاف چینی عوام کی فتح کی 80ویں سالگرہ کی تقریبات میں شرکت کی دعوت دی ہے۔

انہوں نے کہا کہ روسی صدر ولادیمیر پیوٹن بھی اس موقع پر چین میں موجود ہوں گے، اس لیے ان سے ملاقات کا امکان ہے۔ چینی صدر شی جن پنگ 3 ستمبر کو عالمی رہنماؤں کے اعزاز میں عشائیہ دیں گے، جبکہ 5 ستمبر کو ایک اور اہم عالمی رہنما عشائیہ دیں گے جس کی تفصیل سکیورٹی وجوہات کی بنا پر ظاہر نہیں کی گئی۔

(جاری ہے)

چینی صدر نے حالیہ بیان میں کہا کہ چین، سربیا کے ساتھ اسٹریٹجک تعاون کو مزید وسعت دینا چاہتا ہے، جبکہ صدر ووچچ نے چین کو "سربیا کا عزیز دوست" قرار دیتے ہوئے ون چائنا پالیسی کی حمایت کا اعادہ کیا۔

واضح رہے کہ چین اور سربیا کے درمیان حالیہ برسوں میں تعاون میں تیزی آئی ہے، اور اب تک 30 سے زائد مشترکہ منصوبے شروع کیے جا چکے ہیں۔ 2024 میں دونوں ممالک کے درمیان تجارتی حجم 8.3 ارب یورو کی بلند ترین سطح تک پہنچ گیا ہے۔