پنجاب آئی ٹی بورڈ کی جانب سے 5 سے 13 سال کے بچوں کیلئے دو ہفتوں پر مشتمل سمر کیمپ اختتام پذیر، سرٹیفکیٹس تقسیم

پیر 4 اگست 2025 16:00

لاہور (اُردو پوائنٹ اخبارتازہ ترین۔ 04 اگست2025ء) ارفع سافٹ ویئر ٹیکنالوجی پارک میں پنجاب انفارمیشن ٹیکنالوجی بورڈ کے ہیومن ریسورس ونگ کی جانب سے 5 سے 13 سال کے بچوں کیلئے دو ہفتوں پر مشتمل سمر کیمپ کے کامیاب انعقاد پر تقریب کا اہتمام کیا گیا۔ تقریب کی صدارت پی آئی ٹی بی ڈائریکٹر جنرل ای گورننس ساجد لطیف نے کی۔ اس موقع پر ایچ آر جوائنٹ ڈائریکٹر میراج ندیم، جوائنٹ ڈائریکٹر سجاد قریشی اور اسسٹنٹ ڈائریکٹر ایچ آر سمیرا طاہر سمیت دیگر اعلیٰ افسران شریک ہوئے۔

کیمپ میں 50 سے زائد بچوں نے حصہ لیا جن کو فٹنس، روڈ سیفٹی، ان ڈور کوکنگ، فیشن شو، یوگا، Mock Drills، ٹیم ورک اور کلرنگ وغیرہ سے متعلق مختلف سرگرمیاں کروائی گئیں۔ اختتامی تقریب میں بچوں اور والدین کی بھرپور تعداد شریک ہوئی۔

(جاری ہے)

اس حوالے سے پی آئی ٹی بی چیئرمین فیصل یوسف کا کہنا تھا کہ سمر کیمپ بچوں کی ذہنی، تعلیمی اور تخلیقی صلاحیتوں کو نکھارنے کا ایک مثبت اقدام ہے جس کا مقصد بچوں کو محفوظ ماحول میں تعلیمی اور تفریحی سرگرمیوں کے ذریعے سیکھنے کے مواقع فراہم کرنا ہے اور پی آئی ٹی بی کے تحت آئندہ بھی ایسے ایونٹس کا انعقاد کیا جاتا رہے گا۔

سمر کیمپ میں بچوں کو ان کی پرجوش شرکت پر سرٹیفکیٹس دیئے گئے جبکہ انتظامی ٹیم کے اراکین کو بھی ان کی محنت اور لگن کیلئے تعریفی سرٹیفکیٹس تقسیم کیے گئے۔