خیبرپختونخوا میں 7 اکتوبر تک گرج چمک کے ساتھ بارش کی پیشگوئی

تیز ہواؤں اور گرج چمک کے باعث کمزور مکانات، بجلی کے کھمبے، بورڈزاورسولر پینلزکو نقصان پہنچنے کا خدشہ ہے، پی ڈی ایم اے

جمعرات 2 اکتوبر 2025 20:35

خیبرپختونخوا میں 7 اکتوبر تک گرج چمک کے ساتھ بارش کی پیشگوئی

پشاور(اُردو پوائنٹ اخبارتازہ ترین - این این آئی۔ 02 اکتوبر2025ء)صوبائی ڈیزاسٹر منیجمنٹ (پی ڈی ایم ای) نے پیش گوئی کی ہے کہ خیبرپختونخوا کے مختلف علاقوں میں 7 اکتوبر تک وقفے وقفے سے گرج چمک کے ساتھ بارش کا امکان ہے۔پی ڈی ایم اے کی جانب سے بارشوں کے پیش نظر صوبے کی تمام ضلعی انتظامیہ کو پیشگی اقدامات سے متعلق الرٹ رہنے کے لئے مراسلہ جاری کردیا گیا ہے۔

پی ڈی ایم اے کے مطابق 7 اکتوبر کے دوران دیر اپر اور لوئر، چترال اپر اور لوئر، سوات، کوہستان اپر اور لوئر، کولائی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ اور مہمند کے اضلاع میں وقفے وقفے سے گرج چمک کے ساتھ تیز آندھی اور موسلادھار بارش کا امکان ہے۔اس دوران کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی و جنوبی وزیرستان، ٹانک اور ڈیرہ اسماعیل خان کے اضلاع میں بھی آندھی اور گرج چمک کے ساتھ تیز بارش کا قوی امکان ہے۔

(جاری ہے)

پی ڈی ایم اے نے بتایا کہ موسلادھار بارش کے باعث بالائی و زیریں دیر، بالائی و زیریں چترال، سوات، شانگلہ، بونیر، بالائی و زیریں کوہستان، مانسہرہ، ایبٹ آباد، چارسدہ، نوشہرہ، صوابی اور مردان کے اضلاع میں مقامی ندی نالوں اور چشموں میں پانی کے بہاؤ میں اضافے کا امکان ہے۔مقامی انتظامیہ کو جاری مراسلے میں پی ڈی ایم اے نے کہا ہے کہ بارش کے باعث ایبٹ آباد، بٹگرام، بونیر، بالائی و زیریں چترال، بالائی و زیریں دیر، خیبر، بالائی و زیریں کوہستان، کولائی پالس، کرم، ملاکنڈ، مانسہرہ، مہمند، اورکزئی، شانگلہ، سوات، تورغر اور شمالی وزیرستان کے پہاڑی علاقوں میں لینڈ سلائیڈنگ کے سبب سڑکوں کی بندش کا خدشہ ہے۔