Live Updates

محکمہ زراعت پنجاب نے اگست کے دوران کپاس کی بہتر نگہداشت کیلئے سفارشات جاری کر دیں

منگل 5 اگست 2025 22:51

لاہور (اُردو پوائنٹ اخبارتازہ ترین - اے پی پی۔ 05 اگست2025ء) ترجمان محکمہ زراعت پنجاب کے مطابق اگست کا مہینہ کپاس کی فصل کے لیے انتہائی اہم ہے۔ کاشتکار بارش کی صورت میں اگر زائد پانی کھیت میں کھڑا ہو جائے تو اس کی نکاسی کا بندوبست کریں۔ اس مقصد کے لیے کھیتوں کے ارد گرد چھوٹے تالاب یا کھالیاں بنائیں۔جہاں فصل پانی کھڑا رہنے کی وجہ سے کمزور حالت میں ہے وہاں بارش کے بعد میگنیشیم سلفیٹ بحساب 500 گرام اور 2 کلو گرام یوریا فی ایکڑ سپرے کریں۔

اس موسم کے دوران رس چوسنے والے کیڑے مثلا تیلہ، سفید مکھی اور تھرپس تیزی سے افزائش نسل کرتے ہیں اور رس چوس کر فصل کو کمزور کر دیتے ہیں جبکہ سنڈیاں بھی حملہ آوور ہو جاتی ہیں، لہذا محکمہ زراعت کے مقامی زرعی ماہرین کے مطابق ایسی سفارش کردہ زرعی زہریں استعمال کریں ۔

(جاری ہے)

ایک ہی کیمسٹری کی زرعی زہروں کے بار بار استعمال سے گریز کریں۔کپاس کی فصل پر پائر یتھرائڈ گروپ کے زہروں کے استعمال سے گریز کریں تاکہ سفید مکھی کا حملہ بڑھ نہ جائے۔

گلابی سنڈی کے حملے کا بروقت پتہ لگانے کے لیے ہفتہ میں دو بار کپاس کی فصل کی پیسٹ سکاٹنگ کریں۔گلابی سنڈی کی مانیٹرنگ کے لیے روشنی کا استعمال کریں۔کپاس کی چنائی صبح 10 بجے شروع کریں جس وقت فصل اور ٹینڈوں پر سے رات کی شبنم خشک ہو جائے تاکہ کپاس بد رنگ نہ ہونے پائے اور نمی کی وجہ سے جننگ کے دوران مشکلات کا سامنا بھی نہ ہو۔چنائی ہمیشہ پودے کے نچلے حصے سے مکمل کھلے ہوئے ٹینڈوں سے شروع کریں اور بتدریج اوپر کو چنائی کرتے جائیں تاکہ پودے کے سوکھے پتے چنی ہوئی کپاس میں شامل نہ ہوں۔چنائی کے بعد پھٹی کو ایک دو دھوپ ضرور لگوائیں تاکہ نمی کو مناسب سطح پر لایا جا سکے۔