سید یوسف رضا گیلانی سے ان کے کزن سید تنویر الحسن گیلانی کے انتقال پر تعزیت، پارلیمنٹ ہاؤس میں قرآن خوانی و دعائے مغفرت کا اہتمام

منگل 5 اگست 2025 21:40

اسلام آباد(اُردو پوائنٹ اخبارتازہ ترین - این این آئی۔ 05 اگست2025ء)چیئرمین سینیٹ سید یوسف رضا گیلانی سے ان کے چچا زاد بھائی اور سابق وفاقی وزیر سید تنویر الحسن گیلانی کے انتقال پر تعزیت کیلئے پارلیمنٹ ہاؤس میں مختلف شعبہ ہائے زندگی سے تعلق رکھنے والے افراد، ارکان پارلیمنٹ، معزز سینیٹرز، ارکان قومی اسمبلی اور سینیٹ و قومی اسمبلی کے افسران کی بڑی تعداد نے ملاقات کی۔

تعزیت کیلئے آنے والے وفود نے چیئرمین سینیٹ سے اظہارِ ہمدردی کرتے ہوئے مرحوم کے ایصال ثواب کیلئے دعائیں کیں اور ان کی قومی خدمات کو خراج تحسین پیش کیا۔پارلیمنٹ ہاؤس کی جامع مسجد میں مرحوم سید تنویر الحسن گیلانی کے ایصال ثواب کیلیے قرآن خوانی اور دعائے مغفرت کا خصوصی اہتمام کیا گیا، جس میں سینیٹرز، اراکین اسمبلی، پارلیمنٹ ہاس کے افسران و ملازمین اور دیگر شرکا کی بڑی تعداد نے شرکت کی۔

(جاری ہے)

اس موقع پر مرحوم کے لیے بلند درجات، مغفرت اور لواحقین کیلئے صبر جمیل کی دعائیں کی گئیں۔وفود نے چیئرمین سینیٹ سے گفتگو کے دوران کہا کہ وہ اس غم کی گھڑی میں ان کے ساتھ برابر کے شریک ہیں۔اللہ تعالی مرحوم کو جنت الفردوس میں اعلیٰ مقام عطا فرمائے اور اہلخانہ کو یہ عظیم صدمہ برداشت کرنے کی ہمت دے۔سینیٹ سیکریٹریٹ اور ارکان پارلیمان نے بھی مرحوم کے انتقال پر گہرے رنج و غم کا اظہار کیا ہے اور ان کے ساتھ اپنی دیرینہ وابستگی اور خدمات کو یاد کرتے ہوئے انہیں خراج عقیدت پیش کیا۔