ایڈیشنل آئی جی آر ایم پی خرم شکور کا پولیس ٹریننگ کالج چوہنگ لاہور کا دورہ

منگل 5 اگست 2025 22:40

لاہور (اُردو پوائنٹ اخبارتازہ ترین - اے پی پی۔ 05 اگست2025ء) وزیر اعلی پنجاب مریم نواز کے محفوظ پنجاب ویژن کی تکمیل میں پولیس ٹریننگ کالج چوہنگ لاہور میں آر ایم پی سپیشلائزڈ ٹریننگ کورس جاری ہے جس میں 265اہلکار آر ایم پی سپیشلائزڈ کورس کی ٹریننگ حاصل کر رہے ہیں۔ایڈیشنل آئی جی آر ایم پی خرم شکور نے پولیس ٹریننگ کالج چوہنگ لاہور کا دورہ کیا۔

ڈی آئی جی رائٹ مینجمنٹ پولیس اسد سرفراز خان بھی ان کے ہمراہ تھے۔

(جاری ہے)

ترجمان پنجاب پولیس نے بتایا کہ ایڈیشنل آئی جی نے ٹریننگ کرنے والے جوانوں کا حوصلہ بڑھایا، مسائل سنے اور فوری حل کیلئے احکامات جاری کیے۔ایڈیشنل آئی جی آر ایم پی نے کہا کہ رائٹ مینجمنٹ پولیس کی صلاحیتوں میں اضافے کیلئے خصوصی آلات اور ساز و سامان مہیا کیا گیا ہے۔6ہفتوں پر مشتمل سپیشلائزڈ کورس میں فورس کی فٹنس اور کارکردگی کا معیار برقرار رکھنے کے لئے سپیشل ڈرلز ڈیزائن کی گئی ہیں۔

ڈی آئی جی آر ایم پی اسد سرفراز خان نے کہا کہ دور حاضر کے لا اینڈ آرڈر چیلنجز کو مدنظر رکھتے ہوئے آر ایم پی اہلکاروں کو سپیشلائزڈ ٹریننگ کورس کروایا جارہا ہے تاکہ ہر قسم کے چیلنجز کیلئے اپنے آپ کو مستعد رکھیں اور فیلڈ میں ضرورت پڑنے پر بہترین خدمات انجام دیں۔