فیلڈ مارشل نے کاروباری شخصیات کو ایف بی آر کے کالے قوانین سے بچا لیا

فنانس ایکٹ کے سیکشن 37 اے میں ترمیم کردی گئی، آئندہ کاروباری برادری کی مشاورت کے بغیر کسی تاجر کو گرفتار نہیں کیا جا سکے گا، سابق نگران وزیر گوہر اعجاز کا اعلان

محمد علی جمعرات 7 اگست 2025 20:39

فیلڈ مارشل نے کاروباری شخصیات کو ایف بی آر کے کالے قوانین سے بچا لیا

لاہور ( اُردو پوائنٹ اخبارتازہ ترین۔ 07 اگست 2025ء )سابق نگران وزیر گوہر اعجاز کی جانب سے بتایا گیا ہے کہ فیلڈ مارشل نے کاروباری شخصیات کو ایف بی آر کے کالے قوانین سے بچا لیا، فنانس ایکٹ کے سیکشن 37 اے میں ترمیم کردی گئی، آئندہ کاروباری برادری کی مشاورت کے بغیر کسی تاجر کو گرفتار نہیں کیا جا سکے گا۔ تفصیلات کے مطابق گزشتہ دنوں فیلڈ مارشل جنرل عاصر منیر سے کاروباری شخصیات کی ہونے والی ملاقات کے بعد اہم پیش رفت ہوئی ہے۔

سابق وفاقی نگران وزیر گوہر اعجاز کی جانب سے بتایا گیا ہے کہ فیلڈ مارشل سید عاصم منیر نے کاروباری شخصیات کو ایف بی آر کے کالے قوانین سے بچا لیا ہے۔ ایکس پر اپنے بیان میں گوہر اعجاز نے کہا ہے کہ ٹیکس گزاروں کو آج بڑی کامیابی ملی ہے، فیلڈ مارشل سید عاصم منیر نے کاروباری شخصیات کی عزت کو محفوظ کر لیا ہے، ایف بی آر نے کاروباری برادری کے مطالبے پر فنانس ایکٹ میں ترمیم کردی ہے۔

(جاری ہے)

گوہر اعجاز کا کہنا ہے کہ فنانس ایکٹ کے سیکشن 37 اے میں ترمیم کردی گئی ہے، کاروباری برادری کی مشاورت کے بغیر کسی تاجر کو گرفتار نہیں کیا جا سکے گا۔ ان کا یہ بھی کہنا ہے کہ ملک بھر کے 18 چیمبرز آف کامرس نے فیلڈ مارشل سید عاصم منیر کے سامنے کاروباری شخصیات کی گرفتاری کا معاملہ اٹھایا تھا، کاروباری شخصیات کی گرفتاری سے قبل سیف گارڈز یقینی بنانے کا اعلان کیا گیا تھا۔

سابق وفاقی وزیر نے بتایا کہ ایف پی سی سی آئی، چیمبرز آف کامرس اور دیگر سٹیک ہولڈرز ایف بی آر کی کمیٹی کا حصہ ہوں گے، کاروباری شخصیات کے خلاف انکوائری اور انوسٹی گیشن سے قبل کمیٹی کی منظوری لازمی ہے۔ یہاں واضح رہے کہ گزشتہ دنوں ملک کی معروف کاروباری شخصیات نے فیلڈ مارشل عاصم منیر سے خصوصی ملاقات کی تھی۔ ملاقات کے دوران ایف بی آر کے نئے قوانین کے نفاذ سے متعلق شدید تحفظات کا اظہار کیا گیا تھا۔