پنجاب حکومت کا 9 سے 14 سال تک کی بچیوں کی سروائیکل کینسر سے بچاؤ کی ویکسینیشن کرنے کا فیصلہ

ویکسینیشن مہم کا 15 ستمبر سے باقاعدہ آغاز کیا جائےگا، مہم میں 8 ملین بچیوں کو ویکسینیٹ کرنے کا ہدف مقرر، کوئی بھی بیٹی اینٹی سروائیکل کینسر ویکسین سے محروم نہیں رہے گی، وزیرصحت خواجہ عمران نذیر

ثنااللہ ناگرہ جمعہ 8 اگست 2025 19:29

پنجاب حکومت کا 9 سے 14 سال تک کی بچیوں کی سروائیکل کینسر سے بچاؤ کی ویکسینیشن ..

لاہور (اُردو پوائنٹ اخبارتازہ ترین۔ 08 اگست 2025ء) صوبائی وزیر صحت و آبادی خواجہ عمران نذیر کی زیر صدارت ضلعی سطح پر ایچ پی وی ویکسینیشن مہم کے انتظامات کا جائزہ لینے کے حوالے سے اجلاس منعقد ہوا - تمام اضلاع سے سی ای او ہیلتھ نے آن لائن شرکت کی-ایڈیشنل سیکریٹریز ورٹیکل پروگرام، ٹیکنیکل اور ڈی جی ہیلتھ اور ڈائریکٹر ای پی آئی ڈاکٹر ثمرہ بھی اس موقع پر موجود تھے- وزیر صحت کو اجلاس میں بریفنگ دیتے ہوئے بتایا گیا کہ سروائیکل کینسر سے بچاو کی ویکسینیشن مہم کا باقاعدہ آغاز 15 ستمبر سے کیا جائے گا جس میں 9 سے 14 سال تک کی بچیوں کی ویکسینیشن کی جائے گی- اجلاس کو مذید بتایا گیا کہ اس مہم میں 8 ملین بچیوں کو ویکسینیٹ کرنے کا ہدف مقررکیا گیا-

صوبائی وزیر صحت و آبادی خواجہ عمران نذیر نے کہا کہ وزیراعلی پنجاب مریم نواز شریف کی ہدایت پر صوبہ بھر کی بچیوں کو سروائیکل کینسر سے بچاو کی ویکسینیشن کی جائے گی اور مریم نواز شریف کا حکم ہے کہ صوبے کی کوئی بھی بیٹی اینٹی سروائیکل کینسر ویکسین سے محروم نہیں رہنی چائیے- انہوں نے مذید کہا کہ ایچ پی وی ویکسین عالمی ادارہ صحت سے منظور شدہ اور مکمل محفوظ ہے۔

(جاری ہے)

انہوں نے کہا کہ اس مہم میں سکولوں کے علاوہ مراکز صحت اور کلینک آن ویلز پر بھی ایچ پی وی ویکسین کی سہولت مفت دستیاب ہو گی۔ انہوں نے ہدایت کی کہ ضلعی سطح پر مانیٹرنگ ٹیمز تشکیل دے کر ویکسینیشن مہم کی مکمل نگرانی کی جائے۔ خواجہ عمران نذیر نے والدین سے بھی اپیل کی کہ وہ اپنی بچیوں کو اس جان لیوا بیماری سے محفوظ بنانے میں اپنا کردار ادا کریں اور اس مہم کے دوران اپنی بچیوں کو ویکسینیشن ضرور لگوائیں۔

صوبائی وزیر صحت و آبادی نے کہا کہ محکمہ صحت کی ٹیمیں ضلعی انتظامیہ کے ساتھ گھر گھر جا کر ویکسینیشن کی ترغیب دیں۔ وزیر اعلی پنجاب نے ملکی تاریخ میں پہلی مرتبہ خواتیں کو سروائیکل کینسر سے بچانے کیلئے باقاعدہ پروگرام شروع کرنے کا فیصلہ کیا ہے۔ انہوں نے کہا کہ پنجاب ملک کا پہلا صوبہ ہے جہاں خواتین کو سروائیکل کینسر سے بچانے کیلئے باقاعدہ پروگرام شروع کیا جا رہا ہے۔

خواجہ عمران نذیر نے کہا کہ اس مہم کا دائرہ کار سرکاری سکولوں کے علاوہ پرائیویٹ سکولز اور مدرسہ تک پھیلایا بھی جائے-انہوں نے کہا کہ وزیر اعلی پنجاب کی ہدایت پر مہم کے دوران محکمہ صحت کی ٹیمیں سکولوں میں جا کر بچیوں کو ویکسین دیں گی-اس مہم سے نہ صرف سروائیکل کینسر بلکہ ایچ پی وی سے پیدا ہونے والی دیگر بیماریوں سے بھی بچاو ممکن ہو گا- متعلقہ حکام کو ہدایات جاری کرتے ہوئے خواجہ عمران نذیر نے کہا مطلوبہ نتائج کے حصول کے لئے اس مہم میں محکمہ ایجوکیشن سکولز اور ضلعی انتظامیہ کو بھی شامل کیا جائے-مہم کی 100 فیصد کامیابی کے لئے جوائنٹ ورکنگ گروپ اور مربوط روابط یقینی بنائے جائیں اور اساتذہ اور والدین کو آگاہی فراہم کرنے کے لئے سیمینار اور آگاہی مہم شروع کئے جائیں۔

خواجہ عمران نذیر نے کہا کہ آج کی بیٹی کل کی ماں ہے، آئندہ نسل کی بہتری کے لئے اس کا صحتمند ہونا ضروری ہے-