الحمرا میں جشن آزادی کے سلسلے میں 30فٹ لمبا اور 64فٹ چوڑا سبز پرچم آویزاں کر دیا گیا

ہفتہ 9 اگست 2025 14:46

لاہور (اُردو پوائنٹ اخبارتازہ ترین - اے پی پی۔ 09 اگست2025ء) لاہور آرٹس کونسل الحمرا 78ویں یوم آزادی کے موقع پر ہفتہ بھرکے لئے آزادی کی تقریبات منا رہا ہے۔فنون لطیفہ کے رنگ برنگ پروگرامز پیش کئے جا رہے ہیں۔اس مناسبت سے موسیقی کا کنسرٹ کا انعقاد کیا گیا۔پروگرام میں نامور آرٹسٹ جبار عباس نے پرفارم کیا۔دوران پرفارمنس ہال عوام سے بھرا رہا،یہ الحمرا ہی کا خاصہ ہے کہ وہ ایسے پروگرام ترتیب دیتا ہے جسے عوام میں مقبولیت حاصل ہوتی ہے۔

جبار عباس کی آواز جذبہ ومٹھاس سننے والوں کے کانوں میں رس گولتی رہی،اپنی گائیکی کی بدولت جبارعباس کا فن منفرد مقام رکھتا ہے۔ اس اہم موقع پر الحمرا ہال نمبر کی پیشانی پر 30فٹ لمبا اور 64فٹ چوڑا سبز ہلالی پرچم آویزاں کر دیا گیا۔خوشی کے اس موقع پر الحمرا کے عمارت، لانز، درختوں کو سفید اور سبز روشنیوں سے سجایا گیا ہے۔

(جاری ہے)

سیکرٹری اطلاعات وثقافت پنجاب اور ایگزیکٹوڈائریکٹر الحمرا سید طاہر رضا ہمدانی نے اس موقع پر کہا کہ سبز ہلالی پرچم کا یہ خوبصورت منظر دیکھنے والوں میں ملی جوش و خروش اور اپنے وطن سے محبت کا باعث بنتا ہے،وطن عزیز کی منفردادبی وثقافتی،تہذیبی و تمدنی شناخت پر فخر ہے جسے بھرپور انداز میں اجاگر کر رہے ہیں،آزادی کی قدر وقیمت سے نوجوانوں کو روشناس کروا رہے ہیں۔

چیئرمین الحمرا رضی احمد نے اپنے تاثرات میں کہا کہ اس اہم موقع پر آزادی کے نغموں پر مبنی پروگرام پیش کر کے مادر ملت سے اپنی محبت کا اظہار کر رہے ہیں،یہ دیکھ کر اچھا لگتا ہے کہ عوام الحمرا کے پروگرامز کی زینت بنتے ہیں اور یہ امر ہمارے لئے قابل فخر اور حوصلہ افزا ہوتا ہے۔