کراچی، خونی ڈمپر کا ایک اور وار، موٹر سائیکل سوار 2نوجوانوں کو کچل دیا، ایک جاں بحق

متوفی کورنگی نمبر 4 سو کوارٹر کا رہائشی اور 4 بھائیوں میں سب سے چھوٹا تھا

جمعرات 14 اگست 2025 14:39

کراچی(اُردو پوائنٹ اخبارتازہ ترین - این این آئی۔ 14 اگست2025ء)شہر قائد میں ایک اور نوجوان ڈمپر کی بھینٹ چڑھ گیا ، سپرہائی وے ٹول پلازہ کے قریب بدھ اور جمعرات کی درمیانی شب تیز رفتار ڈمپر نے موٹرسائیکل سوار دو نوجوانوں کو کچل دیا۔تفصیلات کے مطابق گڈاپ سٹی کے علاقے سپرہائی وے ٹول پلازہ کے قریب ٹریلر کی ٹکر سے موٹرسائیکل سوار ایک نوجوان جاں بحق اور ایک زخمی ہوگیا۔

(جاری ہے)

جاں بحق و زخمی ہونے والے نوجوانوں کو ایدھی ایمبولینس کے ذریعے عباسی شہید اسپتال منتقل کی گئی ، ترجمان چھیپا شاہد چوہدری کے مطابق جاں بحق ہونے والے شخص کی شناخت 20 سالہ شہباز ولد ستار اور زخمی کی 20 سالہ حسینین ولد یامین کے نام سے کی گئی۔متوفی کورنگی نمبر 4 سو کوارٹر کا رہائشی اور 4 بھائیوں میں سب سے چھوٹا تھا جبکہ وہ چمڑے کے دستانے بنانے کا کام کرتا تھا۔