ٹاپ سیڈڈ جینک اور ٹیرنس اتمانے سنر سنسناٹی اوپن ٹینس مینز سنگلز کے سیمی فائنل میں پہنچ گئے

جمعہ 15 اگست 2025 08:20

اوہائیو (اُردو پوائنٹ اخبارتازہ ترین - اے پی پی۔ 15 اگست2025ء) اٹلی کے نامور ٹینس سٹار، عالمی نمبر ون اور ایونٹ کے دفاعی چیمپئن جینک سنر اور فرانس کے ٹینس کھلاڑی ٹیرنس اتمانے اپنی عمدہ کارکردگی کی بدولت سنسناٹی اوپن ٹینس ٹورنامنٹ میں مردوں کے سنگلز مقابلوں کے سیمی فائنل رائونڈ میں پہنچ گئے۔ 23 سالہ اطالوی ٹینس سٹار نے مردوں کے سنگلز مقابلوں کے کوارٹر فائنل رائونڈ میں کینیڈین حریف کھلاڑی فیلکس اوجرالیاسائم کو شکست دی تھی۔

فرانسیسی ٹینس سٹار ٹیرنس اتمانے نے مینز سنگلز کوارٹر فائنل رائونڈ میچ میں ڈنمارک کے حریف کھلاڑی ہولگر رونے کو شکست دے کر ٹاپ فوررائونڈ کے لئے کوالیفائی کیا ۔امریکی ریاست اوہائیو کے شہر سنسناٹی میں جاری ایونٹ میں کانٹے دار مقابلوں کا سلسلہ جاری ہے جس میں شائقین ٹینس کو انتہائی دلچسپ مقابلے دیکھنے کو مل رہے ہیں ۔

(جاری ہے)

مردوں کے سنگلز مقابلوں کے کوارٹر فائنل رائونڈ میں23 سالہ اٹلی کے جینک سنر نے شاندار کارکردگی کا مظاہرہ کرتے ہوئے کینیڈین حریف کھلاڑی فیلکس اوجرالیاسائم کو سٹریٹ سیٹس میں 0-6 اور 2-6 سے ہرا کر سیمی فائنل رائونڈ کے لئے کوالیفائی کرلیا۔

یہ بات بھی قابل ذکر ہے کہ گزشتہ تین سالوں میں جینک سِنر نے شاندار ترقی کرتے ہوئے چار گرینڈ سلام ٹائٹلز جیتے اور اب وہ ٹینس میں مردوں کے سنگلز مقابلوں کی عالمی رینکنگ میں ٹاپ پوزیشن پر موجود ہیں ۔جینک سِنر اب سیمی فائنل میں فرانس کےکوالیفائر ٹینس کھلاڑی ٹیرنس اتمانے سے پنجہ آزمائی کریں گے۔ایک اور کوارٹر فائنل میچ میں 23 سالہ فرانس کے ٹینس کھلاڑی ٹیرنس اتمانےنے عمدہ کھیل پیش کرتے ہوئے ڈنمارک کے حریف کھلاڑی ہولگر رونے سٹریٹ سیٹس میں 2-6اور 3-6سے اپ سیٹ شکست دے کر ایونٹ کے سیمی فائنل رائونڈ کے لئے کوالیفائی کرلیا۔ \932