کامران اکمل کا کپتان اور ہیڈ کوچ کو فارغ کرنے کا مطالبہ

کوچ، مینجمنٹ اور کپتان کا احتساب کیوں نہیں کیا جاتا : سابق ٹیسٹ کرکٹر

ذیشان مہتاب جمعہ 15 اگست 2025 15:33

کامران اکمل کا کپتان اور ہیڈ کوچ کو فارغ کرنے کا مطالبہ

لاہور (اردو پوائنٹ تازہ ترین اخبار ۔ 15 اگست 2025ء ) سابق وکٹ کیپر بیٹر کامران اکمل نے کپتان اور ہیڈ کوچ دونوں کو ہی فارغ کرنے کا مطالبہ کردیا۔

سابق ٹیسٹ سٹار نے کہا کہ دونوں کو معلوم ہی نہیں کہ کنڈیشنز کس طرح کی ہیں، کس کمبی نیشن کے ساتھ میدان میں اترنا یا اسپنرز کو کیسے استعمال کرنا ہے۔

43 سالہ کامران اکمل نے کہا کہ چیمپئنز ٹرافی میں بھی اسپن آپشنز کو نظر انداز کیا گیا اور اب ایشیا کپ بھی اسپن کنڈیشنز میں ہی کھیلا جانا ہے۔

(جاری ہے)

کامران اکمل نے کہا کہ آپ کو ایک جارحانہ کپتان کی ضرورت ہے، اس لیے شاہین شاہ آفریدی کو قیادت سونپنی چاہیے، وہ پی ایس ایل میں مسلسل قائدانہ صلاحیتوں کا مظاہرہ کررہے ہیں، انھیں پہلے کپتان بناکر ایک ہی سیریز کے بعد ہٹا دینے سے نقصان ہوا۔

کامران نے کہا کہ پہلے بنگلا دیش اور اب ویسٹ انڈیز کے ہاتھوں شرمناک شکست پر گورننگ بورڈ کی میٹنگ بلاکر کوچ، مینجمنٹ اور کپتان کا احتساب کیوں نہیں کیا جاتا، انھیں فارغ کرنے کی ضرورت ہے۔