اسٹیٹ بینک نے جشن معرکۂ حق کے موقع پر 75 روپے کا یادگاری سکّہ جاری کردیا

اسٹیٹ بینک کی جانب سے جاری ہونے والا سکہ دھاتی ساخت، خوب صورت شکل اور خصوصیات کا حامل ہے

جمعہ 15 اگست 2025 18:28

اسٹیٹ بینک نے جشن معرکۂ حق کے موقع پر 75 روپے کا یادگاری سکّہ جاری کردیا

لاہور (اُردو پوائنٹ اخبارتازہ ترین۔ 15 اگست2025ء) وفاقی حکومت نے معرکہ حق میں مسلح افواج کی بہادری کو خراجِ تحسین پیش کرنے اور جشنِ آزادی کے موقع پر 75 روپے کا یادگاری سکّہ جاری کیاہے۔ یہ سکہ تانبہ 79 فیصد، زنک 20 فیصد اور نکل ایک فیصد پر مشتمل ہے جس کا قطر 30 ملی میٹراوروزن 13.5 گرام ہے۔سامنے کا رخ: سکّے کے سامنے کے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ ہے، جس کا رخ شمال مغرب کی طرف ہے۔

ستارے اور ہلال کے اوپر سکّے کے کنارے کے ساتھ ساتھ اردو میں ’’اسلامی جمہوریہ پاکستان‘‘ کے الفاظ کندہ ہیں۔ چاند کے نیچے اور گندم کی اوپر کی طرف خمیدہ دو بالیوں کے اوپرعددی صورت میں اجرا کا سال 2025 درج ہے۔ ستارے اور ہلال کے دائیں اور بائیں جانب بالترتیب سکّے کی مالیت جلی اعداد میں ’’75‘‘ اور اردو رسم الخط میں ’’روپیہ‘‘ تحریر ہے۔

(جاری ہے)

پچھلا رُخ: پچھلے رخ پر وسط میں اردو میں ’’معرکہ? حق‘‘ اور ہندسوں میں ’’2025‘‘کے الفاظ درج ہیں۔ سکّے کے بالائی کناروں پر اردو میں ’’پاکستان ہمیشہ زندہ باد‘‘ رقم ہے۔ سکّے کے پچھلے رخ پر (دائیں اور بائیں جانب ) دو لڑاکا طیارے، بحری جہاز، ملٹی پل راکٹ لانچر سسٹم ابھرے ہوئے دکھائی دیتے ہیں۔مذکورہ سکّہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاونٹرز پر 15 اگست 2025ء سے دستیاب ہے۔