صوبائی وزیر خواجہ سلمان رفیق کی چہلم حضرت امام حسین وعرس حضرت علی ہجویری کے پر امن انعقاد پر انتظامیہ کی ستائش

ہفتہ 16 اگست 2025 21:43

لاہور (اُردو پوائنٹ اخبارتازہ ترین - اے پی پی۔ 16 اگست2025ء) صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے چہلم حضرت امام حسین اور عرس حضرت علی ہجویری کے پر امن انعقاد پر انتظامیہ کو شاباش دی ہے ۔خواجہ سلمان رفیق نے کہاکہ پاک فوج،محکمہ داخلہ، پولیس، محکمہ صحت، رینجرز، ریسکیو 1122، ضلعی انتظامیہ، اوقاف، بلدیات، فوڈ اتھارٹی، ڈسکوز، سول ڈیفنس و دیگر اداروں نے اہم کردار ادا کیا،اللٰہ تعالی کے کرم سے صوبہ بھر میں دونوں ایونٹس انتہائی پر امن گزرے ہیں ،دونوں ایونٹس کے پر امن انعقاد میں علماء کرام اور امن کمیٹیوں نے بھی اہم کردار ادا کیا ہے۔

وزیر اعلی پنجاب کی ہدایت پر صوبہ بھر میں امن اور اتحاد بین المسلمین کا پیغام پہنچایا،پولیس، فوج اور رینجرز نے مجالس و جلوسوں کو فول پروف سکیورٹی فراہم کی ہے،علماء نے بھی اتحاد بین المسلمین کا درس دیا۔

(جاری ہے)

خواجہ سلمان رفیق نے کہاکہ حضرت امام حسین اور ان کے رفقا کی قربانی کو رہتی دنیا تک یاد رکھا جائے گا،پنجاب میں امن و امان کی فضا کو یقینی بنانے کیلئے ہمہ وقت کوشاں ہیں۔

سیکرٹری داخلہ پنجاب ڈاکٹر احمد جاوید قاضی نے صوبہ بھر میں انتظامیہ، پولیس، ریسکیو، محکمہ صحت، اوقاف و دیگر تمام متعلقہ محکموںکو شاباش دی۔ سیکرٹری داخلہ نے کہاکہ اللٰہ کے فضل اور تمام محکموں کے ٹیم ورک سے پرامن چہلم و عرس تکمیل کو پہنچے،چہلم و عرس پر تمام مجالس و جلوسوں کی کیمروں کے ذریعے مانیٹرنگ یقینی بنائی گئی،دونوں ایونٹس پر فرائض سر انجام دینے والے افسران و اہلکار شاباش کے مستحق ہیں ۔انہوں نے کہاکہ سکیورٹی ودیگر انتظامات یقینی بنانے کیلئے متعلقہ اداروں کے ساتھ مکمل کوآرڈی نیشن میں رہے۔