وزیراعلیٰ پنجاب کا ممکنہ طوفانی بارشوں کے پیش نظر متعلقہ اداروں کو الرٹ رہنے کا حکم

پی ڈی ایم اے، انتظامیہ، پولیس، ریسکیو کو ضروری پیشگی اقدامات کی ہدایت کرتے ہوئے ڈپٹی کمشنرز اور دیگرمتعلقہ افسران کو فیلڈ میں موجود رہنے کے احکامات دے دیئے گئے

ساجد علی اتوار 17 اگست 2025 18:50

وزیراعلیٰ پنجاب کا ممکنہ طوفانی بارشوں کے پیش نظر متعلقہ اداروں کو ..

لاہور ( اُردو پوائنٹ اخبارتازہ ترین۔ 17 اگست 2025ء ) وزیراعلیٰ مریم نوازنے پنجاب میں ممکنہ طوفانی بارشوں کے پیش نظر متعلقہ اداروں کو الرٹ رہنے کا حکم دے دیا۔ تفصیلات کے مطابق وزیراعلیٰ پنجاب نے پی ڈی ایم اے، انتظامیہ، پولیس، ریسکیو کو ضروری پیشگی اقدامات کی ہدایت کرتے ہوئے ڈپٹی کمشنرز اور دیگرمتعلقہ افسران کو فیلڈ میں موجود رہنے کے احکامات دئیے ہیں، انہوں نے کہا کہ ڈپٹی کمشنرز، پی ڈی ایم اے پنجاب کی جاری کردہ ہدایات پر عملدرآمد یقینی بنائیں، بالائی پنجاب میں کلاؤڈ برسٹ کے خدشے کے پیش نظر ضروری اقدامات کی ہدایت کی جاتی ہے اور کوہِ سلیمان میں ممکنہ سیلابی ریلوں سے بچاؤ کے لئے پیشگی انتظامات کیے جائیں۔

بتایا گیا ہے کہ وزیراعلی مریم نواز نے مری، راولپنڈی، جہلم، چکوال اور کوہ سلیمان کے اضلاع میں خصوصی اقدامات کا حکم دیا ہے، حفاظتی اقدامات کے پیش نظر مری اور متصل علاقوں کی طرف سیاحتی سفر پر پابندی پر اتفاق کیا گیا ہے، کلاوڈبرسٹ، لینڈ سلائیڈنگ اور طوفانی بارشوں کے پیش نظر سیاحوں کی نقل وحمل محدود کرنے کی ہدایت کی گئی ہے، جس پر پی ڈی ایم اے پنجاب فوری متحرک اور درکار وسائل مہیا کرنے کے لیے سرگرم عمل ہے۔

(جاری ہے)

معلوم ہوا ہے کہ وزیراعلیٰ پنجاب نے پی ڈی ایم اے اور ڈپٹی کمشنرز کو طوفانی بارشوں کے پیش نظر دریاؤں کے بہاؤ میں غیر معمولی اضافے کے خدشے کے پیش نظر پیشگی اقدامات کی ہدایت کی ہے، وزیراعلی کی ہدایت پر آبی گزر گاہوں کے ارد گرد آبادیوں کے لیے کشتیاں، لائف جیکٹ اور دیگر سامان مہیا کردیا گیا، دریاؤں کے پاٹ میں موجود شہریوں کے فوری انخلاء کو یقینی بنایا جائے گا، دریاوں، نہروں و ندی نالوں میں طغیانی کے پیش نظرنہانے پر پابندی یقینی بنائی جائے گی، والدین سے بچوں کو دریاؤں اور ندی نالوں کے قریب جانے سے روکنے کی اپیل کی گئی ہے۔