ماڈل و اداکارہ حمیرا کی موت، قتل کا مقدمہ درج کرنیکا حکم

مقامی عدالت نے پولیس کو 154 کے تحت مقدمہ درج کرنے کی ہدایت کردی

پیر 18 اگست 2025 17:10

ماڈل و اداکارہ حمیرا کی موت، قتل کا مقدمہ درج کرنیکا حکم

کراچی(اُردو پوائنٹ اخبارتازہ ترین - این این آئی۔ 18 اگست2025ء)ماڈل و اداکارہ حمیرا اصغر کی پراسرار موت پر ڈسٹرکٹ سیشن عدالت نے پولیس کو قتل کا مقدمہ درج کرنے کا حکم دے دیا۔ عدالت نے ہدایت کی کہ مرحومہ کے اہل خانہ کے بیانات قلمبند کیے جائیں۔کراچی میں فلیٹ سے ماڈل و اداکارہ حمیرا اصغر کی لاش ملنے کے معاملے میں اہم پیشرفت ہوگئی، عدالت نے پولیس کو قتل کا مقدمہ درج کرنے کا حکم دیدیا۔

ایڈیشنل ڈسٹرکٹ اینڈ سیشن جج سائوتھ نے حکم دیاکہ مرحومہ کے اہل خانہ کے بیانات قلمبند کئے جائیں، پولیس قانون کے مطابق اس حوالے سے کارروائی کرے۔پولیس نے عدالت کو بتایا کہ حمیرا اصغر کے گھر والوں سے رابطہ ہوا ہے، مرنے والی خاتون کا پوسٹ مارٹم ہوچکا ہے، حتمی فارنزک رپورٹ کا انتظار ہے اس کے بعد مزید کارروائی کریں گے۔

(جاری ہے)

عدالت نے اداکارہ کے قتل کا مقدمہ درج کرنے کی درخواست نمٹادی، عدالت نے کہا کہ پولیس کو 154 کے تحت مقدمہ درج کرنے کی ہدایت کی جاتی ہے، 154 کے تحت مقدمہ بنتا ہے تو درج کیا جائے۔

وکیل نے عدالت میں دلائل دیتے ہوئے کہا کہ حمیرا کی موت 7 اکتوبر کو ہوئی، فون فروری 2025 تک استعمال ہوا، فون کھلا تھا میک اپ آرٹسٹ کا فون اٹینڈ نہیں ہوا، اس فون کے بعد واٹس ایپ ڈی پی بھی ڈیلیٹ کردی گئی، میک اپ آرٹسٹ کو بھی بلایا جائے۔وکیل نے کہا کہ حمیرا اصغر کے بھائی اور دیگر کو شامل تفتیش کرنے کا حکم دیا جائے، پولیس رپورٹ میں واش روم اور کمرے سے خون کے نمونے لینے کا ذکر ہے۔ تفتیشی افسر نے کہا کہ اگر ثبوت ملے تو ہم خود مقدمہ درج کرلیں گے۔