حکومت آزادکشمیر بارشوں اور لینڈ سلائیڈنگ سے متاثر ہونے والے عوام کے نقصان کا فوری ازالہ کریں گے،شازیہ کیانی ایڈووکیٹ

منگل 19 اگست 2025 16:25

مظفرآباد(اُردو پوائنٹ اخبارتازہ ترین - این این آئی۔ 19 اگست2025ء)نامور قانون دان شازیہ کیانی ایڈووکیٹ نے ملک بھر سمیت آزاد جموں وکشمیر میں بھی طوفانی بارشوں اور لینڈ سلائیڈنگ سے جانی ومالی نقصانات پر گہرے دکھ اور افسوس کا اظہار کیا ہے انھوں نے کہا ہے کہ حکومت آزادکشمیر بارشوں اور لینڈ سلائیڈنگ سے متاثر ہونے والے عوام کے نقصان کا فوری ازالہ کریں گے،جملہ محکمہ جات فوری طور پر نقصانات کا تخمینہ لگائیں اور حکومت آزادکشمیر معاوضہ جات کی ادائیگی کرے، موسمیاتی تبدیلی کے اثرات پوری دنیا میں ہیں ہم بھی موسمیاتی تبدیلی سے متاثر ریاست ہیں،ہمیں آفات سماوی سے بچاؤ کے لیے اقدامات کی سخت ضرورت ہے ان خیالات کا اظہار انھوں نے گذشتہ روز میڈیا سے گفتگو کرتے ہوئے کیا انھوں نے کہا کہ ندی نالوں کے قریب تعمیرات سے زیادہ نقصان ہوتا ہے،پانی اپنا راستہ بنا لیتا ہے ہمیں مستقبل کے چیلنجز کو سامنے رکھتے ہوئے منصوبہ بندی کرنی ہو گی انسانی جان کا کوئی نعم البدل نہیں۔

(جاری ہے)

انھوں نے مزید کہا کہ موسمیاتی تبدیلی کے اثرات سے جہاں پوری دنیا متاثر ہے وہاں پر ہم بھی اسکا حصہ ہیں نالوں میں غیر قانونی تجاوزات کو فوری روکا جائے اور ایسے لوگوں کے خلاف سخت کاروائی کی جائے جو نالوں میں غیر قانونی تعمیرات کر رہے ہوں، انہوں نے کہا کہ ہم نے بطور معاشرہ ملکر ان تبدیلیوں کا سامنا کرنا ہے جس کے لیے سخت اقدامات کرنے ہونگے۔

انہوں نے کہا کہ بارشوں کے دوران مختلف حادثات میں فوت شدگان کے لواحقین سے دلی ہمدردی کا اظہار کرتے ہیں انسانی جان کا کوئی نعم البدل نہیں ہے انسانی جان کا ازالہ تو نہیں کر سکتے البتہ ایسے متاثرین کی فوری امداد کی جائے حکومت آزادکشمیر متاثرین کیساتھ بھرپور تعاون کرے کسی بھی ہنگامی صورت حال میں اداروں کو متحرک رہنا ہو گا تا کہ کوئی انسانی جان ضائع نہ ہو۔