آئی جی پنجاب نے بہترین کارکردگی کا مظاہرہ کرنے والے مزید 68 افسران و اہلکاروں کیلئے 25 لاکھ سے زائد کے کیش انعامات اور تعریفی اسناد کے احکامات جاری کردئیے، ترجمان

منگل 19 اگست 2025 22:50

لاہور (اُردو پوائنٹ اخبارتازہ ترین - اے پی پی۔ 19 اگست2025ء) آئی جی پنجاب ڈاکٹر عثمان انور نے ملک دشمن و جرائم پیشہ افراد کے خلاف بہترین کارکردگی کا مظاہرہ کرنے والے افسران و اہلکاروں کی حوصلہ افزائی کے لئے کیش انعامات اور تعریفی اسناد کے احکامات جاری کیے ہیں۔ ترجمان پنجاب پولیس کے مطابق آئی جی پنجاب نے 68 افسران و اہلکاروں کیلئے 25 لاکھ 75 ہزار روپے کے کیش انعامات اور تعریفی اسناد دینے کے احکامات جاری کیے ہیں۔

(جاری ہے)

افسران و اہلکاروں کو 25 ہزار سے 50 ہزار روپے تک کیش ایوارڈ اور تعریفی اسناد سے نوازا گیا۔ انعامات حاصل کرنے والوں میں 15 انسپکٹرز، 9 سب انسپکٹرز، 11 اے ایس آئیز، 15 ہیڈ کانسٹیبلز اور 18 کانسٹیبلز شامل ہیں۔ آئی جی پنجاب نے کہا کہ افسران و اہلکاروں نے لا اینڈ آرڈر کے قیام اور شہریوں کے جان و مال کے تحفظ کیلئے احسن طریقے سے فرائض انجام دئیے۔ خدمت خلق کے جذبے سے سرشار فرض شناس اور باہمت افسران و اہلکار پنجاب پولیس کا اثاثہ ہیں۔