معروف وکیل حنا جیلانی کو ٹرائل کورٹ کی جانب سے جاری شوکاز نوٹس معطل

بدھ 20 اگست 2025 11:56

لاہور (اُردو پوائنٹ اخبارتازہ ترین - اے پی پی۔ 20 اگست2025ء) لاہور ہائیکورٹ نے معروف وکیل حنا جیلانی کو ٹرائل کورٹ کی جانب سے جاری کیے گئے شوکاز نوٹس کو معطل کر دیا۔جسٹس خالد اسحاق نے بدھ کوکیس کی سماعت کی۔ عدالت نے درخواست گزار کو ہدایت کی کہ درخواست سے جج کا نام نکالا جائے اور آئندہ سماعت پر فریقین سے جواب طلب کر لیا۔

(جاری ہے)

درخواست گزار کے مطابق وہ خواتین کے بنیادی حقوق کے تحفظ کے لیے کام کرتی ہیں۔ موقف اپنایا گیا کہ کیس میں لڑکی کے پیش نہ ہونے پر ٹرائل کورٹ نے شوکاز نوٹس جاری کیا جو غیر قانونی ہے، کیونکہ وکیل کو اس بنیاد پر شوکاز نوٹس نہیں دیا جا سکتا۔درخواست میں استدعا کی گئی ہے کہ سینئر سول جج کے شوکاز نوٹس کو کالعدم قرار دے کر کیس کی دوبارہ سماعت کا حکم دیا جائے۔