سیکرٹری داخلہ پنجاب کی زیر صدارت ’’ہنرمند اسیر پروگرام‘‘بارے اعلی سطحی اجلاس

لاہور (اُردو پوائنٹ اخبارتازہ ترین - این این آئی۔ 20 اگست2025ء) سیکرٹری داخلہ پنجاب ڈاکٹر احمد جاوید قاضی نے آئی جی جیل خانہ جات آفس میں ’’ہنرمند اسیر پروگرام‘‘کے حوالے سے اعلی سطحی اجلاس کی صدارت کی۔ اجلاس میں آئی جی جیل خانہ جات میاں فاروق نذیر، ایڈیشنل سیکرٹری پریزن عاصم رضا، چیئرمین پنجاب ووکیشنل ٹریننگ کونسل خالد مسعود چوہدری، چیئرپرسن ٹیوٹا بریگیڈیئر ساجد کھوکھر، ڈی جی آپریشنز عامر عزیز، ڈی آئی جی پریزن سالک جلال، ڈی آئی جی لاہور ریجن نوید رف، بینک آف پنجاب اور پی آئی ٹی بی سے افسران نے شرکت کی۔

اجلاس میں سیکرٹری داخلہ ڈاکٹر احمد جاوید قاضی نے جیلوں میں تیار کردہ مصنوعات کی مقدار اور قیدیوں کو ملنے والے معاوضے کا جائزہ لیا۔ انھوں نے کہا کہ محکمہ داخلہ قیدیوں کی بحالی، ہنر مندی اور سماجی و معاشی ترقی کیلئے ٹھوس اقدامات اٹھا رہا ہے۔

(جاری ہے)

پنجاب کی جیلوں میں کارپٹ، ٹف ٹائل، فرنیچر، ایل ای ڈی بلب، جوتے، دستانے، فٹ بال، کپڑے، صابن، فینائل، واشنگ پاڈر اور ٹرنک وغیرہ تیار کیے جارہے ہیں۔

قیدیوں کو معاشرے کا مفید شہری بنانے کیلئے پنجاب کی تمام جیلوں میں حجام، درزی، باورچی، موٹرسائیکل مکینک، الیکٹریشن، ہینڈی کرافٹس کی تیاری بارے تربیت دی جا رہی ہے۔ سیکرٹری داخلہ پنجاب نے اسیران کی تربیت کو فروغ دینے کیلئے ہر جیل میں تیار کردہ مصنوعات کی مقدار اور قیدی کو ملنے والے معاوضے کو ہر سپرنٹنڈنٹ جیل کی کارکردگی میں شمار کرنے کی ہدایت کی۔

سیکرٹری داخلہ نے کہا کہ ’’ہنرمند اسیر پروگرام ‘‘کے تحت جیل انڈسٹری میں کام کرنے والے قیدیوں کو باعزت روزگار اور معاوضہ مل رہا ہے۔ اس طرح جیل اصلاحات کے تحت تربیت پانے والے ہنر مند قیدی اپنے اہل خانہ کی کفالت کے قابل ہو گئے ہیں۔ سیکرٹری داخلہ نے قیدیوں کی لگن اور کوششوں کو سراہتے ہوئے ہدایت کی کہ تکنیکی تربیت مکمل کرنے والے کامیاب اسیران کو ٹیوٹا اور پی وی ٹی سی سرٹیفکیٹ دیئے جائیں اور رہائی کے وقت انھیں مفت ٹول کٹس بھی فراہم کی جائیں تاکہ انہیں باعزت رزق حاصل کرنے میں سہولت ہو۔

جیلوں میں تکنیکی تربیت کے معیار پر گفتگو کرتے ہوئے انھوں نے کہا کہ ہر جیل میں قیدیوں کو تربیت دینے کیلئے ماہر استاد موجود ہیں جبکہ جیل انڈسٹری کے حوالے سے ان کا کہنا تھا کہ قیدیوں کی بنائی گئی مصنوعات کی تشہیر کیساتھ ساتھ انھیں مارکیٹ میں فروخت بھی کیا جا رہا ہے۔ قیدیوں کی بنائی ہوئی مصنوعات خریدنے کیلئے شہری پنجاب جیل خانہ جات کی ویب سائٹ www.prisonstore.com.pkپر آن لائن آرڈر دے سکتے ہیں۔

آن لائن خریداری کے عمل کے علاوہ تمام جیلوں کے باہر بھی مصنوعات کی نمائش اور فروخت کیلئے ڈسپلے سینٹرز قائم کیے گئے ہیں۔ سیکرٹری داخلہ نے بتایا کہ نجی شعبے کو جیل انڈسٹری میں سرمایہ کاری کے مواقع فراہم کر رہے ہیں۔ سیکرٹری داخلہ نے اجلاس کے دوران نجی شعبے کے سرمایہ کاروں سے مسائل جانے اور جیل انڈسٹری کی بہتری کیلئے سفارشات بھی طلب کیں۔

بعد ازاں سیکرٹری داخلہ پنجاب ڈاکٹر احمد جاوید قاضی نے کیمپ جیل لاہور کا دورہ کیا اور ہنرمند اسیر پروگرام کے تحت نئے تیار کردہ سلائی تربیتی سینٹر کا افتتاح کیا۔ سیکرٹری داخلہ نے سکل ڈویلپمنٹ سینٹر، حجام سینٹر، موٹر مکینک تربیتی مرکز، لائبریری اور جیل ہسپتال کا دورہ بھی کیا۔ اس موقع پر آئی جی جیل خانہ جات میاں فاروق نذیر، ایڈیشنل سیکرٹری پریزن عاصم رضا، سپرنٹنڈنٹ جیل ظہیر ورک و دیگر متعلقہ افسران بھی ہمراہ تھے۔