دریائوں میں پانی کی سطح بلند، بند ٹوٹنے سے فصلیں اور بستیاں متاثر

دریائے ستلج میں پاکپتن کے علاقے ملک بہاول کے قریب حفاظتی بند ٹوٹنے سے دریا کا پانی دھان اور دیگر فصلوں میں داخل ہو گیا

بدھ 20 اگست 2025 18:01

دریائوں میں پانی کی سطح بلند، بند ٹوٹنے سے فصلیں اور بستیاں متاثر

لاہور/ پاکپتن / عارف والا / قصور(اُردو پوائنٹ اخبارتازہ ترین - این این آئی۔ 20 اگست2025ء)حالیہ بارشوں کے باعث دریائوں میں پانی کی سطح مسلسل بلند ہونے سے پنجاب کے مختلف علاقوں میں سیلابی صورتحال پیدا ہوگئی ہے۔دریائے ستلج میں پاکپتن کے علاقے ملک بہاول کے قریب حفاظتی بند ٹوٹنے سے دریا کا پانی دھان اور دیگر فصلوں میں داخل ہو گیا۔مقامی افراد کے مطابق انہوں نے کئی روز سے اپنی مدد آپ کے تحت بند باندھ رکھا تھا اور بارہا حکام سے مدد کی اپیل بھی کی مگر تاحال کوئی سرکاری مدد نہیں پہنچی، اہل علاقہ نے ایک بار پھر حکومت سے فوری امداد کی اپیل کی ہے۔

دوسری جانب عارف والا میں نچلے درجے کی سیلابی صورتحال مسلسل برقرار ہے، بستی مینگل، فرید نگر اور دیگر چھوٹی بستیاں پانی کی لپیٹ میں آگئی ہیں، پانی کے تیز بہا ئوسے مختلف مقامات پر زمینداروں کے عارضی بند ٹوٹ گئے، جس کے باعث بڑی تعداد میں کھڑی فصلیں تباہ ہوگئیں۔

(جاری ہے)

ریسکیو ذرائع کے مطابق اب تک 50 سے زائد افراد کو سیلابی علاقوں سے محفوظ مقامات پر منتقل کیا جا چکا ہے۔

قصور میں ہیڈ گنڈا سنگھ پر دریائے ستلج کی سطح 19.40 فٹ ریکارڈ کی گئی جبکہ پانی کا بہا ئو68 ہزار 200 کیوسک تک پہنچ گیا ہے۔حاکو والا گائوں میں پانی گھروں اور کھیتوں میں داخل ہوگیا، ضلعی انتظامیہ کی جانب سے فلڈ ریلیف کیمپ قائم کر دیئے گئے ہیں اور امدادی سرگرمیاں جاری ہیں۔ڈپٹی کمشنر عمران علی کے مطابق بارشوں کے حالیہ الرٹ کے باعث پانی کی سطح میں مزید اضافے کا خدشہ ہے۔