گہری کھیلیاں بنا کر کمادکی ستمبر کاشتہ فصل سے 1150من فی ایکڑپیداوار حاصل کی جا سکتی ہے، شاہد انجم

جمعرات 21 اگست 2025 13:47

فیصل آباد (اُردو پوائنٹ اخبارتازہ ترین - اے پی پی۔ 21 اگست2025ء) شوگر کین سپیشلسٹ شاہد انجم نے کہا ہے کہ گنے کی نئی اقسام کی کاشت سے ملک میں چینی کی پیداوار میں 4فیصد تک اضافہ کیاجاسکتاہے ۔ انہوں نے کہا کہ جدید پیداواری ٹیکنالوجی کے استعمال سے پاکستان کو دنیا میں گنا پیداکرنے والا سب سے بڑا ملک بنانے میں بھی مدد مل سکتی ہے نیز کماد کی بمپر کراپ کے حصول کے لئے کی جانے والی تحقیق کے ثمرات کاشتکاروں تک پہنچانے کے مثبت اثرات مرتب ہو سکتے ہیں۔

(جاری ہے)

انہوں نے کہا کہ جدید تحقیق کے مطابق اگر رجر کے ذریعے گہری کھیلیاں بنا کر کماد کاشت کی جائے تو بہاریہ فیصل کی فی ایکڑ پیداوار 840 من جبکہ ستمبر کاشتہ فصل سے پیداوار 1150من فی ایکڑ حاصل ہو سکتی ہے۔ انہوں نے کہاکہ پاکستان میں گنے کی اوسط پیداوار 565 من فی ایکڑ کے قریب ہے جبکہ ترقی پسند کاشتکار 1500من فی ایکڑ پیداوار حاصل کررہے ہیں۔ انہوں نے کہاکہ گنے کی نئی اقسام کی کاشت سے پانی کی کمی کے باوجود اچھی پیداوار حاصل ہو سکتی ہے جس سے چینی کی پیداوار میں 4 فیصد تک اضافہ ممکن ہے۔