اسلام آباد میں فی الحال سٹیڈیم کی تعمیر کا ارادہ نہیں : چیئرمین سی ڈی اے

ماہرین کی رائے کے بعد دیکھیں گے اسلام آباد میں کہاں کرکٹ سٹیڈیم تعمیر کرنا ہے : محمد علی رندھاوا

ذیشان مہتاب جمعرات 21 اگست 2025 12:11

اسلام آباد میں فی الحال سٹیڈیم کی تعمیر کا ارادہ نہیں : چیئرمین سی ڈی ..

اسلام آباد (اردو پوائنٹ تازہ ترین اخبار ۔ 21 اگست 2025ء ) چیئرمین سی ڈی اے محمد علی رندھاوا نے کہا ہے کہ اسلام آباد میں فی الحال اسٹیڈیم کی تعمیر کا ارادہ نہیں ہے۔

نجی ٹی وی جیو نیوز سے گفتگو کرتے ہوئے چیئرمین سی ڈی اے نے کہا کہ اسلام آباد میں کرکٹ اسٹیڈیم تاحال تعمیرکرنے کا ارادہ نہیں ہے تاہم شہر میں کرکٹ اور فٹبال کے 25، 25 گراؤنڈز بنائیں گے۔

انہوں نے کہا کہ اسلام آباد میں کرکٹ اسٹیڈیم بنانے پر پی سی بی کے ساتھ میٹنگ ہوئی ہے، ماہرین کی رائے کے بعد دیکھیں گے کہ اسلام آباد میں کہاں کرکٹ سٹیڈیم تعمیر کرنا ہے، سٹیڈیم کی تعمیر کے لیے ماہرین ہی لوکیشن کا انتخاب کریں گے۔

چیئرمین سی ڈی اے کا کہنا تھا کہ اسلام آباد میں فی الوقت کرکٹ گراؤنڈز کے برے حالات ہیں، کرکٹ گراؤنڈز کی پچز کو انٹرنیشنل معیار کا بنانا ہے۔

(جاری ہے)

محمد علی رندھاوا نے مزید کہا کہ اسلام آباد میں مختلف کھیلوں کے گراؤنڈز بنانے کے منصوبے ہیں، ایف 9 پارک میں گراؤنڈ اپگریڈ کرنے کے لیے راشد لطیف کی معاونت لی ہے۔

واضح رہے کہ اس سے قبل یہ خبریں سامنے آئی تھیں کہ سی ڈی اے نے اسلام آباد کے ایف نائن پارک میں اسٹیڈیم بنانے کا فیصلہ کیا ہے تاہم اس حوالے سے شدید ردعمل آنے پر سی ڈی اے نے بعد ازاں وضاحت جاری کی تھی کہ پارک میں کسی نئے اسٹیڈیم کو بنانے کا منصوبہ نہیں ہے۔