وزیر ہائوسنگ کی زیر صدارت ہڈیارہ ڈرین میں ویسٹ واٹر بغیر ٹریٹمنٹ ڈالنے کی روک تھام بارے اجلاس

ابتدائی طور پر ہڈیارہ ڈرین کے 10کلومیٹر ایریا کو پائلٹ پراجیکٹ بنانے کا فیصلہ پنجاب حکومت انڈسٹری کو بھی پابند کر رہی ہے کہ ویسٹ واٹر کی ٹریٹمنٹ کے پلانٹ لگائے‘وزیر ہائوسنگ پنجاب بلال یاسین

جمعرات 21 اگست 2025 19:30

لاہور (اُردو پوائنٹ اخبارتازہ ترین - این این آئی۔ 21 اگست2025ء) وزیر ہائوسنگ اینڈ اربن ڈویلپمنٹ بلال یاسین کی زیر صدارت ہڈیارہ ڈرین میں ویسٹ واٹر بغیر ٹریٹمنٹ ڈالنے کی روک تھام بارے اہم اجلاس منعقد ہوا۔اجلاس میں ڈی جی واسا پنجاب طیب فرید، ڈی جی ایل ڈی اے طاہر فاروق اور آباد ممبران نے شر کت کی۔اجلاس میں ڈی جی واسا پنجاب طیب فرید نے بریفنگ دیتے ہوئے بتایا کہ ہڈیارہ ڈرین میں انڈسٹری اور نجی سکیموں کی جانب سے بغیر ٹریٹمنٹ پانی ڈالا جا رہا ہے۔

نجی اسکیمیں ٹریٹڈ پانی کو دوبارہ اپنے استعمال میں لا سکیں گی۔ واسا لاہور سمیت دیگر اضلاع میں بھی ویسٹ واٹر ٹریٹمنٹ لگا رہا ہے۔وزیر ہائوسنگ بلال یاسین نے کہا کہ وزیراعلی پنجاب مریم نواز کی خصوصی ہدایت پر ویسٹ واٹر ٹریٹمنٹ اور پانی کے ضیاع کی روک تھام بارے ٹھوس میکانزم پر کام کر رہے ہیں۔

(جاری ہے)

شہر کی ڈرینز میں ویسٹ واٹر بغیر ٹریٹمنٹ ڈالنے کی روک تھام اور ویسٹ واٹر ٹریٹمنٹ کی انسٹالیشن بارے مختلف تجاویز کا جائزہ لے رہے ہیں۔

انڈسٹریز اور رہائشی اسکیموں سے ویسٹ واٹر پانی کی آلودگی کا باعث بن رہا ہے۔ ہڈیارہ ڈرین پر مختلف پوائنٹس پر ویسٹ واٹر ٹریٹمنٹ پلانٹس بنانے پر بھی غور کر رہے ہیں۔ ابتدائی طور پر ہڈیارہ ڈرین کے 10کلومیٹر ایریا کو پائلٹ پراجیکٹ بنایا جائے گا۔رہائشی سکیموں میں ویسٹ واٹر کی ٹریٹمنٹ کا کوئی ٹھوس میکانزم موجود نہیں ہے۔پی ایچ اے، ہائوسنگ اسکیموں اور انڈسٹری سے مل کر گرین بیلٹ بنائے گا۔پنجاب حکومت انڈسٹری کو بھی پابند کر رہی ہے کہ ویسٹ واٹر کی ٹریٹمنٹ کے پلانٹ لگائے۔ موسمیاتی تبدیلیاں اور آلودگی ہم سب کے لیے بہت بڑا چیلنج ہے،ان سے نبردآزما ہونا وقت کی ضرورت ہے۔حکومت،نجی سیکٹر سے مل کر اس مسلے کو حل کرنے کیلئے ٹھوس میکانزم پر کام کر رہی ہے۔