ملک کے مختلف علاقوں میں حالیہ بارشوں کے باعث دریاؤں میں سیلابی صورتحال پیداہوگئی

جمعہ 22 اگست 2025 18:00

کراچی (اُردو پوائنٹ اخبارتازہ ترین - این این آئی۔ 22 اگست2025ء)ملک کے مختلف علاقوں میں حالیہ بارشوں کے باعث دریاؤں میں سیلابی صورتحال پیدا ہوگئی ہے، دریائے سندھ کی صورتحال کا جائزہ لینے کے لیے صوبائی وزیر آبپاشی جام خان شورو کی صدارت سندھ سیکریٹریٹ میں اہم اجلاس منعقد ہوا. اجلاس میں سیکریٹری آبپاشی ظریف کھیڑو نے صوبائی وزیر کو گڈو، سکھر اور کوٹری بیراج سمیت دریائے سندھ کی صورتحال پر تفصیلی بریفنگ دی۔

(جاری ہے)

اس موقع پر ایم ڈی سیڈا پریتم داس، چیف انجینئرز سکھر، گڈو اور کوٹری بیراج، سدرن سندھ ڈرینج ریجن، پی ڈی تھر کول واٹر ورکس پروجیکٹ اور دیگر افسران بھی آن لائن شریک ہوئے۔اجلاس میں صوبے کے مختلف ایریگیشن اور ڈرینج ریجنز کے منصوبوں سے متعلق امور کا بھی جائزہ لیا گیا۔ صوبائی وزیر نے افسران اور عملے کو ہدایت دی کہ دریاؤں کے بندوں کو مضبوط اور محفوظ بنایا جائے تاکہ کسی بھی ہنگامی صورتحال سے بچا جاسکے۔

وزیر آبپاشی سندھ جام خان شورو نے افسران کو سیلابی صورتحال کے پیش نظر الرٹ رہنے اور بیراجوں و بندوں پر عملے کی ڈیوٹیاں سختی سے یقینی بنانے کی ہدایت کی۔ انہوں نے عوام کو بھی تاکید کی کہ وہ دریاں، برساتی ندی نالوں اور بندوں کے قریب غیر ضروری نقل و حرکت سے اجتناب کریں۔