نجی ٹور آپریٹرز کے حج کوٹہ کے خلاف کیس میں درخواست گزار کی جانب سے درخواست واپس لینے کی استدعا منظور

جمعہ 22 اگست 2025 20:43

اسلام آباد(اُردو پوائنٹ اخبارتازہ ترین - آن لائن۔ 22 اگست2025ء) اسلام ہائیکورٹ نے نجی ٹور آپریٹرز کے حج کوٹہ کے خلاف کیس میں ایک درخواست گزار کی جانب سے درخواست واپس لینے کی استدعا منظور کرلی ۔اسلام آباد ہائیکورٹ میں جسٹس محمد اعظم خان نے نجی ٹورآپریٹر کی متفرق درخواست پر سماعت کی، درخواست گزار کی جانب سے چوہدری اسامہ طارق ایڈووکیٹ عدالت میں پیش ہوئے۔

(جاری ہے)

چوہدری اسامہ طارق ایڈووکیٹ نے کہا کہ مرکزی کیس میں درخواست گزاران کی فہرست میں میرے کلائنٹ کو نام شامل ہے، کمپنی کا ڈائریکٹر ہوں اور کیس کا علم ہی نہیں تھا، ایک روز پہلے علم ہوا کہ انکی کمپنی کا نام بھی درخواستگزاروں میں شامل ہے۔درخواست گزار کے مطابق میری رضامندی کے بغیر درخواست میں میرا نام شامل کیا گیا جس کا مجھے علم نہیں، کوئٹہ سے اسی لئے آیا ہوں، استدعا ہے کہ عدالت مرکزی کیس کے درخواست گزاران سے میرا نام نکالنے کا حکم دے، عدالت نے نجی ٹورآپریٹر کی متفرق درخواست منظور کرلی۔