استقبال ربیع الاول مشعل بردار جلوس کل مغلپورہ سے نکالا جائے گا

ہفتہ 23 اگست 2025 18:15

لاہور (اُردو پوائنٹ اخبارتازہ ترین - آن لائن۔ 23 اگست2025ء) تحریک منہاج القرآن لاہور (عزیز بھٹی ٹائون) کے زیراہتمام استقبال ماہ ربیع الاول کے سلسلے میں مغل پورہ چوک سے باغبانپورہ تک مشعل بردار جلوس 25 اگست2025 (پیر) کو شام ساڑھے 6 بجے نکالا جائے گا، جلوس کی قیاد ت صدر منہاج القرآن انٹرنیشنل پروفیسرڈاکٹر حسین محی الدین قادری کرینگے۔ عزیز بھٹی ٹاؤن پی پی 156 اور 148سے نکالے جانیوالے مشعل بردار جلوس کے تمام راستوں کو بینرز، رنگ برنگی جھنڈیوں، غباروں، اسم محمدﷺ کے پوسٹرز اور برقی قمقموں سے سجا دیا گیا ہے۔

انجمن تاجران شالیمار لنک روڈ، جی ٹی روڈ کی طرف سے دودھ کی سبیلیں لگائی جائینگی، تاجر رہنما جلوس پر پھولوں کی پتیاں نچھاور کرکے جلوس کا والہانہ استقبال کیا جائیگا۔

(جاری ہے)

صدر تحریک منہاج القرآن عزیز بھٹی ٹاؤن شہباز حسین قادری، ناظم صفدر اقبال قادری، طارق الطاف، حاجی محمد امجد قادری، شیخ حنیف، شیخ وکیل احمد، محمد اسلم طاہر،جاوید مصطفیٰ،حاجی عبد الخالق و دیگر رہنما، مرکزی قائدین شرکاء جلوس کا استقبال کرینگے۔

منہاج نعت کونسل و دیگر نامور ثناء خوانان مصطفیؐ دف پر آمد مصطفیؐ کی نسبت سے کلام پڑھیں گے۔ درود و سلام کی صداؤں میں نکالے جانیوالے استقبال ربیع الاول مشعل بردار جلوس میں سجے ہوئے اونٹ، بگھیوں، گھوڑوں، موٹر سائیکلوں اور پیدل افراد بڑی تعداد میں شریک ہونگے۔ ناظم اعلیٰ منہاج القرآن انٹرنیشنل خرم نواز گنڈاپور،نائب ناظم اعلیٰ محمد رفیق نجم ، نور اللہ صدیقی، صدر منہاج القرآن لاہور اقبال حسین باجوہ، ناظم لاہور ناظم علی رحمت، صدر منہاج القرآن علما کونسل مفتی غلام اصغر صدیقی، پیر سید گلزار حسین شاہ، ثنا اللہ خان، اشتیاق حنیف مغل،حفیظ اللہ جاوید سمیت دیگر رہنماجلوس میں خصوصی شرکت کرینگے۔

مشعل بردار جلوس کا آغاز بعد نماز مغرب ساڑھے 6 بجے شام مغل پورہ چوک سے ہو گا، جلوس شالیمار لنک روڈ، شالامار چوک سے گزرتا ہوا جی ٹی روڈ پر کراؤن شادی ہال میں اختتام پذیر ہو گا۔