پروفیسرڈاکٹر حسین محی الدین قادری کی زیر قیادت استقبال ربیع الاول مشعل بردار جلوس 25 اگست کو نکالا جائے گا

ہفتہ 23 اگست 2025 22:47

لاہور (اُردو پوائنٹ اخبارتازہ ترین - اے پی پی۔ 23 اگست2025ء) تحریک منہاج القرآن لاہور(عزیز بھٹی ٹائون) کے زیراہتمام استقبال ماہ ربیع الاول کے سلسلے میں مغل پورہ چوک سے باغبانپورہ تک مشعل بردار جلوس پیر 25 اگست کو شام 6:30بجے نکالا جائے گا۔ جلوس کی قیاد ت صدر منہاج القرآن انٹرنیشنل پروفیسرڈاکٹر حسین محی الدین قادری کرینگے۔ عزیز بھٹی ٹاون پی پی 156 اور 148سے نکالے جانیوالے مشعل بردار جلوس کے تمام راستوں کو بینرز، رنگ برنگی جھنڈیوں، غباروں، اسم محمد ؐ کے پوسٹرز اور برقی قمقموں سے سجا دیا گیا ہے۔

انجمن تاجران شالیمار لنک روڈ، جی ٹی روڈ کی طرف سے دودھ کی سبیلیں لگائی جائینگی، تاجر رہنما جلوس پر پھولوں کی پتیاں نچھاور کرکے جلوس کا والہانہ استقبال کریں گے۔

(جاری ہے)

صدر تحریک منہاج القرآن عزیز بھٹی ٹاون شہباز حسین قادری، ناظم صفدر اقبال قادری، طارق الطاف، حاجی محمد امجد قادری، شیخ حنیف، شیخ وکیل احمد، محمد اسلم طاہر،جاوید مصطفی،حاجی عبد الخالق و دیگر رہنما، مرکزی قائد ین شرکا جلوس کا استقبال کرینگے۔

منہاج نعت کونسل و دیگر نامور ثنا خوانان مصطفیؐ ۖ دف پر آمد مصطفیؐ ۖ کی نسبت سے کلام پڑھیں گے۔ درود و سلام کی صداوں میں نکالے جانیوالے استقبال ربیع الاول مشعل بردار جلوس میں سجے ہوئے اونٹ، بگھیوں، گھوڑوں، موٹر سائیکلوں اور پیدل افراد بڑی تعداد میں شریک ہونگے۔ ناظم اعلی منہاج القرآن انٹرنیشنل خرم نواز گنڈاپور،نائب ناظم اعلی محمد رفیق نجم ، نور اللہ صدیقی، صدر منہاج القرآن لاہور اقبال حسین باجوہ، ناظم لاہور ناظم علی رحمت ،صدر منہاج القرآن علما کونسل مفتی غلام اصغر صدیقی،پیر سید گلزار حسین شاہ، ،ثنا اللہ خان، اشتیاق حنیف مغل،حفیظ اللہ جاویدسمیت دیگر رہنماجلوس میں خصوصی شرکت کرینگے۔

مشعل بردار جلوس کا آغاز بعد نماز مغرب 6:30 بجے شام مغل پورہ چوک سے ہو گا، جلوس شالیمار لنک روڈ، شالامار چوک سے گزرتا ہوا جی ٹی روڈ پر کراون شادی ہال پر اختتام پذیر ہوگا۔