’مذہب میں رعایت موجود ہے‘، محمد شامی کا دوران رمضان میچ میں انرجی ڈرنک پینے پر ردعمل

گزشتہ رمضان المبارک کے دوران ایک میچ میں گراؤنڈ میں محمد شامی انرجی ڈرنک پی رہے تھے جس کے بعد سوشل میڈیا پر انہیں تنقید کا نشانہ بنایا گیا

ذیشان مہتاب جمعرات 28 اگست 2025 14:02

’مذہب میں رعایت موجود ہے‘، محمد شامی کا دوران رمضان میچ میں انرجی ..

ممبئی (اردو پوائنٹ تازہ ترین اخبار ۔ 28 اگست 2025ء ) بھارتی کرکٹ ٹیم کے فاسٹ بولر محمد شامی نے رمضان المبارک میں خود پر ہونے والی تنقید پر ردعمل دیا ہے۔

رواں سال رمضان المبارک کے دوران ایک میچ میں گراؤنڈ میں محمد شامی انرجی ڈرنک پی رہے تھے جس کے بعد سوشل میڈیا پر انہیں تنقید کا نشانہ بنایا گیا۔

اب بھارتی میڈیا کو دیے گئے حالیہ انٹرویو کے دوران محمد شامی نے گزشتہ رمضان کے دوران میچ کے لیے روزہ چھوڑنے اور کھیل کے دوران انرجی ڈرنکس پینے پر پہلی بار کُھل کر بات کی ہے۔

ان کا کہنا تھا کہ ہم 42 یا 45 ڈگری کی گرمی میں میچ کھیل رہے ہوتے ہیں، اپنی جان خطرے میں ڈال رہے ہوتے ہیں، ہمارے مذہب میں بھی اس حوالے سے چھوٹ موجود ہے۔

فاسٹ باولر نے کہا کہ اگر آپ سفر میں ہوں اور ملک کی نمائندگی کر رہے ہوں یا ایسی صورتحال میں ہوں جہاں روزہ رکھنا ممکن نہ ہو تو اسلام میں روزہ چھوڑنے کی اجازت ہے۔

(جاری ہے)

شامی کا کہنا تھا کہ لوگ یہ سمجھیں کہ کھلاڑی کیا کر رہا ہے اور کس مقصد کے لیے قربانی دے رہا ہے، بعد میں اس کی تلافی بھی کی جا سکتی ہے جو میں نے کی تھی۔

خود پر ہونے والی تنقید کے حوالےسے کرکٹر نے کہا کہ میں سوشل میڈیا پر ہونے والی تنقید کو اب بالکل سنجیدہ نہیں لیتا کیونکہ میرے تمام اکاؤنٹس میری ٹیم کے زیرِ انتظام ہیں، کچھ لوگ صرف شہرت حاصل کرنے کے لیے منفی تبصرے کرتے ہیں، میں کبھی کمنٹس نہیں پڑھتا، میری ٹیم ہی میرے اکاؤنٹس کو سنبھالتی ہے۔

بھارتی میڈیا کے مطابق ٹیم کے تجربہ کار فاسٹ بولر محمد شامی اس وقت تینوں فارمیٹس میں مستقل جگہ بنانے کے لیے جدوجہد کر رہے ہیں، انہیں ایشیا کپ 2025ء کے لیے بھی ٹیم میں شامل نہیں کیا گیا۔