پشاور ہائی کورٹ کا خیبرپختونخوا میں بند26 ٹوبیکو فیکٹریاں فوری کھولنے کا حکم،فریقین سے جواب طلب

ایف بی آر کی کارروائی کے باعث سگریٹ انڈسٹری میں درجنوں ملازمین بے روزگار ہو گئے ،عدالت کے ریمارکس

جمعہ 29 اگست 2025 12:50

پشاور(اُردو پوائنٹ اخبارتازہ ترین - این این آئی۔ 29 اگست2025ء)پشاور ہائی کورٹ نے ایف بی آر کی جانب سے خیبرپختونخوا میں26 ٹوبیکو فیکٹریوں کی بندش کے خلاف دائر درخواست پر سماعت کرتے ہوئے تمام فیکٹریوں کو فوری طور پر کھولنے کے احکامات جاری کر دیئے۔جمعہ کوپشاور ہائی کورٹ کے جسٹس وقار احمد اور جسٹس اعجاز خان نے فیڈرل بورڈ آف ریونیو (ایف بی آر) کی جانب سے خیبرپختونخوا میں 26 ٹوبیکو فیکٹریوں کی بندش کے خلاف دائر درخواست پر سماعت کی۔

درخواست گزار کے وکیل نے عدالت کو بتایا کہ ایف بی آر نے کیمرے نصب نہ کرنے کے الزام پر صوبے کی 26 سگریٹ فیکٹریوں کو سیل کر دیا ہے حالانکہ خیبرپختونخوا کے علاوہ ملک کے کسی بھی صوبے میں فیکٹریوں میں کیمرے نصب نہیں ہیں۔انہوںنے کہاکہ ایف بی آر کی ہدایت پر فیکٹریوں میں سی سی ٹی وی کیمرے نصب کیے جا چکے تھے اور 25 اگست تک کا وقت بھی دیا گیا تھا اس کے باوجود فیکٹریوں کو بند کر دیا گیا۔

(جاری ہے)

عدالت نے ایڈیشنل اٹارنی جنرل سے استفسار کیا کہ صرف خیبرپختونخوا کی ٹوبیکو فیکٹریوں کو کیوں بند کیا گیا ہی ۔ عدالت نے ریمارکس دیئے کہ سیکشن 14 بی کے تحت کارخانوں میں افسران کی تعیناتی بھی کی جا چکی ہے لیکن اس کے باوجود فیکٹریوں کو سیل کر دیا گیا۔دوران سماعت عدالت نے کہا کہ ایف بی آر کی کارروائی کے باعث سگریٹ انڈسٹری میں کام کرنے والے درجنوں ملازمین بے روزگار ہو گئے ہیں۔پشاور ہائیکورٹ نے ایف بی آر سمیت تمام متعلقہ فریقین کو نوٹس جاری کرتے ہوئے جواب طلب کر لیا اور درخواست گزاروں کے خلاف کسی بھی کارروائی سے روک دیا۔بعد ازاں عدالت نے سماعت ملتوی کرتے ہوئے آئندہ تاریخ پر مزید دلائل طلب کر لیے۔