Live Updates

سیلاب متاثرین کو روزانہ کی بنیاد پر خوراک، ادویات اور صاف پانی کی فراہمی جاری ہے، ڈپٹی کمشنر سرگودھا

اتوار 31 اگست 2025 16:30

سرگودھا (اُردو پوائنٹ اخبارتازہ ترین - اے پی پی۔ 31 اگست2025ء) ڈپٹی کمشنر کیپٹن (ر) محمد وسیم نے کہا ہےکہ ضلعی انتظامیہ کی پوری فیلڈ فار میشن ٹیم سیلاب متاثرہ علاقوں میں موجود ہے اور سیلاب متاثرین میں ناشتے کی تقسیم کا عمل جاری ہے۔ انہوں نے کہا کہ اسسٹنٹ کمشنرز اور ضلعی افسران نے سیلاب متاثرین میں نہ صرف ناشتہ تقسیم کیا بلکہ ضلعی انتظامیہ کی جانب سے قائم ریلیف کیمپس اور گھروں میں بھی ناشتہ تقسیم کیا جارہا ہے۔

علاؤہ ازیں سیلاب متاثرین کو روزانہ کی بنیاد پر خوراک کی فراہمی جاری ہے۔ ڈپٹی کمشنر نے کہا کہ سیلاب متاثرین کے لیے پینے کے صاف پانی ، ادویات سمیت دیگر ضروری سہولیات کا بھی بندوبست موجود ہے۔ چیف ایگزیکٹو آفیسر ہیلتھ سرگودھا سارہ صفدر کی سربراہی میں متاثرہ علاقوں میں صحت عامہ کی سہولیات کو یقینی بنایا جا رہا ہے۔

(جاری ہے)

اسکے علاؤہ ڈائریکٹر زراعت محمد شاہد حسین کی سربراہی میں متاثرہ علاقوں میں جانوروں کو چارہ جات کی بلاتعطل فراہمی جاری ہے ۔

ڈپٹی کمشنر کیپٹن (ر) محمد وسیم نے کہا کہ اتوار کی چھٹی کے باوجود انتظامی مشینری متاثرین کے ریلیف کے لیے کوشاں ہے۔ بحالی آپریشن میں مصروف پاک فوج، ریسکیو 1122 ، پولیس و دیگر اداروں کے جوان ہمارے اصل ہیروز ہیں جو سیلاب سے متاثرہ خاندانوں کی ہرممکن مدد کر رہے ہیں۔