Live Updates

سیلابی صورتحال میں احتیاطی تدابیر اختیار کر کے بیماریوں سے بچا جا سکتا ہے، پروفیسر اسرار الحق طور

پیر 1 ستمبر 2025 14:42

لاہور (اُردو پوائنٹ اخبارتازہ ترین - اے پی پی۔ 01 ستمبر2025ء) معروف ماہر امراض معدہ و جگر پروفیسر آف میڈیسن میو ہسپتال لاہور ڈاکٹر اسرار الحق طور نے کہا ہے کہ موجودہ سیلابی پانی کے بعد پیدا ہونے والے حالات میں احتیاطی تدابیر اختیار نہ کرنے سے ملیریا، ڈینگی، گیسٹرو انٹرائٹس اور انٹرک فیور جیسی مہلک بیماریاں پھیل سکتی ہیں،ان سے بچائو کے لئے شہریوں کو لازمی طور پر حفاظتی اقدامات کرنے چاہئیں۔

پروفیسر اسرار الحق طور نے کہا کہ شہری مچھر دانی،اسپرے اور جسم کو ڈھانپنے والے کپڑوں کا استعمال کریں اور گھروں کے اندر یا باہر پانی جمع نہ ہونے دیں تاکہ ڈینگی اور ملیریا کے خطرے کو کم کیا جا سکے۔ انہوں نے کہا کہ صرف ابلا ہوا یا فلٹر شدہ پانی استعمال کریں، کھانے سے پہلے اور واش روم کے بعد ہاتھ ضرور صابن سے دھوئیں،کچی سبزیاں یا غیر محفوظ کھانا استعمال نہ کریں اور بچوں کو گندے یا آلودہ پانی میں کھیلنے نہ دیا جائے،پانی کو ہمیشہ ڈھانپ کر رکھیں اور برتن صاف استعمال کریں تاکہ بیماریوں کے پھیلا ئوکو روکا جا سکے۔

(جاری ہے)

انہوں نے مزید کہا کہ اگر کسی کو بخار، قے یا دست کی علامات ظاہر ہوں تو مریض کو فوری طور پر قریبی ڈاکٹر سے رجوع کرنا چاہیے ۔پروفیسر اسرار الحق طور نے زور دیا کہ صفائی نصف ایمان ہے اور یہ بیماریوں کے پھیلا ئوکو روکنے کا بنیادی ذریعہ ہے،بروقت احتیاطی تدابیر پر عمل کر کے شہری اپنے آپ اور بچوں کو خطرناک بیماریوں سے محفوظ رکھ سکتے ہیں۔