Live Updates

پی ڈی ایم اے نے مون سون بارشوں کے 10 ویں اسپیل بارے الرٹ جاری کردیا

6 سے 9 ستمبر تک پنجاب کے بیشتر اضلاع میں شدید طوفانی بارشوں کی پیشگوئی ہے‘ ترجمان

جمعہ 5 ستمبر 2025 11:20

لاہور(اُردو پوائنٹ اخبارتازہ ترین - این این آئی۔ 05 ستمبر2025ء) پرونشل ڈیزاسٹر مینجمنٹ اتھارٹی نے مون سون بارشوں کے 10 ویں اسپیل بارے الرٹ جاری کرتے ہوئے کہا ہے کہ 6 سے 9 ستمبر تک پنجاب کے بیشتر اضلاع میں شدید طوفانی بارشوں کی پیشگوئی ہے۔ ترجمان پی ڈی ایم اے کے مطابق راولپنڈی ،مری ،گلیات ،اٹک ،چکوال ،جہلم، گوجرانولہ، لاہور، گجرات اور سیالکوٹ میں بارشیں متوقع ہیں۔

نارووال، حافظ آباد، منڈی بہائوالدین، اوکاڑہ، ساہیوال، قصور، جھنگ، سرگودھا، اور میانوالی میں بارشوں کا امکان ہے۔ ڈیرہ غازی خان، ملتان اور راجن پور میں بھی بارشوں کا امکان ہے ۔ترجمان پی ڈی ایم ایکے مطابق 7 سے 9 ستمبر کے دوران ڈیرہ غازی خان رودکوہیوں میں فلیش فلڈنگ کا خدشہ ہے۔پی ڈی ایم اے پنجاب نے صوبہ بھر کے کمشنرز اور ڈپٹی کمشنرز کو الرٹ رہنے کی ہدایات جاری کر دی ہیں۔

(جاری ہے)

ڈی جی پی ڈی ایم اے عرفان علی کاٹھیا کے مطابق دریائے چناب راوی اور ستلج میں سیلابی صورتحال کا سامنا ہے،بڑے شہروں میں مون سون بارشوں کے باعث ندی نالے بپھر سکتے ہیں، کمشنر ز ڈپٹی کمشنرز اور دیگر افسران الرٹ ہیں،محکمہ صحت ، آبپاشی ، تعمیر و مواصلات ذ،لوکل گورنمنٹ اور لایئو سٹاک کو الرٹ جاری کر دیا گیا ہے ۔شہریوں سے التماس ہے کہ خراب موسم کی صورتحال میں احتیاطی تدابیر اختیار کر یں،دریائوں کے اطراف اکٹھے ہونے اور سیرو تفریح سے گریز کریں،آندھی و طوفان کی صورتحال میں محفوظ مقامات پر رہیں غیر ضروری سفر سے گریز کریں،ایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔