کمشنر پشاور ڈویژن کی زیر صدارت اجلاس ، چارسدہ میں ڈینگی کے 718 کیسز سامنے آنے پر انکوائری کے احکامات جاری

جمعہ 5 ستمبر 2025 17:50

پشاور (اُردو پوائنٹ اخبارتازہ ترین - اے پی پی۔ 05 ستمبر2025ء) وزیراعلیٰ خیبر پختونخوا علی امین گنڈا پور کی ہدایات پر ڈینگی وائرس کی روک تھام کےلیے یونین کونسلز کی سطح پر اسسٹنٹ کمشنرز کے زیر نگرانی ٹیموں کی تشکیل کرنے کا فیصلہ کیا گیا ہے جبکہ ڈپٹی کمشنرز کو ازخود میدان میں نکلنے کے احکامات جاری کر دیئے گئے ہیں۔ چارسدہ میں سب سے زیادہ 718 کیسز سامنے آنے پر وجوہات اور کوتاہی بارے انکوائری، محکمہ صحت کو فوری طور پر 5 ماہرین حشرات الارض ضلع چارسدہ کو فراہم کرنے ، ضلع چارسدہ میں ضلعی انتظامیہ، محکمہ صحت اور دیگر متعلقہ اداروں کی چھٹیاں منسوخ کرنے کے احکامات جاری کر دیئے گئے ہیں۔

ڈپٹی کمشنر چارسدہ کو ہنگامی اجلاس طلب کرنے اور یونین کونسلوں کی سطح پر میڈیکل کیمپس لگانے کی ہدایات بھی دی گئی ہیں۔

(جاری ہے)

اینٹی ڈینگی اسپرے میں تیزی لانے، حساس قرار دیئے گئے مقامات میں میڈیکل کیمپس لگانے، ہسپتالوں میں ڈینگی کے مریضوں کےلیے الگ الگ وارڈز اور بیڈز مختص کرنے، عوامی آگاہی مہم میں تیزی لانے اور شام تک ادویات اور دیگر ضروریات کی فہرست کمشنر پشاور ڈویژن آفس کو ارسال کرنے کی ہدایات جاری کی گئیں ہیں جبکہ کمشنر پشاور ڈویژن ریاض خان محسود کل ہفتہ کو ضلع چارسدہ کا دورہ کریں گے۔

جمعہ کو ڈینگی کی فوری روک تھام کے حوالے سے کمشنر پشاور ڈویژن ریاض خان محسود کی زیر صدارت اجلاس منعقد ہوا جس میں پشاور ڈویژن کے تمام پانچوں اضلاع پشاور، نوشہرہ، چارسدہ، قبائلی ضلع مہمند اور ضلع خیبر کے ڈپٹی کمشنرز، ڈسٹرکٹ ہیلتھ آفیسرز، ماہرین حشرات الارض اور دیگر متعلقہ افسران نے شرکت کی۔ اجلاس میں کمشنر پشاور ڈویژن کو آگاہی دیتے ہوئے بتایا گیا کہ پشاور ڈویژن کے تمام پانچوں اضلاع میں اب تک ڈینگی کے 786 کیسز سامنے آئے ہیں جن میں سب سے زیادہ چارسدہ سے 718، پشاور 49، نوشہرہ 19 اور قبائلی ضلع خیبر اور ضلع مہمند میں ایک ایک کیس سامنے آیا ہے، مہمند اور خیبر کے کیسز دیگر اضلاع سے سفر کرکے آنے والوں میں سامنے آئے ہیں۔

اجلاس سے خطاب کرتے ہوئے کمشنر پشاور ڈویژن ریاض خان محسود نے ڈینگی پر قابو پانے کےلیے ہنگامی بنیادوں پر اقدامات اٹھانے ، تمام وسائل بروئے کار لانے اور اسسٹنٹ کمشنرز کے ذریعے ٹیموں کی نگرانی کے احکامات جاری کرتے ہوئے تمام اضلاع کے دورے کرنے کا اعلان کیا۔ انہوں نے چارسدہ میں ڈینگی کیسز زیادہ سامنے آنے پر فوری انکوائری کرنے اور وجوہات اور غفلت بارے رپورٹ پیش کرنے کےلیے ایڈیشنل ڈپٹی کمشنر کو احکامات جاری کیے۔