نیشنل پارٹی کے مرکزی ترجمان علی احمد لانگو کی موجودگی میں نیشنل پارٹی و بی این پی منگچر کا اجلاس

=8 ستمبر کو آل پارٹیز کی شٹر ڈان و پہیہ جام ہڑتال سیاسی جمہوری عمل کی سربلندی اور منفی و مذموم عزائم کے خلاف ریفرنڈم ہوگا،علی احمد لانگو ، میر صلاح الدین لانگو

اتوار 7 ستمبر 2025 20:40

ر*قلات /منگچر (اُردو پوائنٹ اخبارتازہ ترین - آن لائن۔ 07 ستمبر2025ء)نیشنل پارٹی کے مرکزی ترجمان علی احمد لانگو نے کہا کہ بلوچستان کی سیاسی جمہوری تحریکوں کے خلاف روز اول سے سازشوں کا سہارا لیا گیا ۔2 ستمبر کو قومی تحریک کے اہم رہنما سردار عطا اللہ مینگل کی برسی کے بعد ہونے والا دھماکہ بلوچستان کی سیاسی قیادت کو راستے سے ہٹانے کی منظم کوشش تھی۔

اجلاس سے خطاب کرتے ہوئے انہوں نے کہا کہ یہ واقعہ 8 اگست 2016 کے سانحے کا تسلسل ہے، جب وکلا کو نشانہ بنا کر بلوچستان کی اجتماعی دانش کو چھینا گیا تھا، اور 2 ستمبر کے واقعے میں بلوچستان کی اجتماعی شعور اور سیاسی قیادت کو نشانہ بنانے کی کوشش کی گئی۔انہوں نے کہا کہ سیاسی کارکنوں کو زندگیوں سے محروم کرنا صرف انسانی جانوں کا ضیاع نہیں بلکہ یہ بلوچستان کے سماجی ارتقا اور شعوری روح کو دبانے کے مترادف ہے۔

(جاری ہے)

اس طرح کے خونی سازشوں و بزدلانہ اقدام کے باوجود سیاسی جماعتیں اپنی جدوجہد سے پیچھے نہیں ہٹیں گی۔انہوں نے کہا کہ بلوچستان کی تاریخ قربانیوں سے عبارت ہے، اور یہاں کے عوام اپنی قیادت، قومی تحریک اور جمہوری حقوق کے دفاع کے لیے ہمیشہ برسر پیکار رہیں گے۔ انہوں نے کہا کہ حکمران طاقت کے ذریعے بلوچ عوام کی آواز کو دبانے کی کوشش کرتے ہیں لیکن یہ آواز مزید مضبوط ہو کر ابھرے گی۔

علی احمد لانگو نے کہا کہ 8 ستمبر کی شٹر ڈان اور پہیہ جام ہڑتال بلوچستان کے عوام کا پرامن جمہوری احتجاج ہوگا،جو منفی و مذموم عزائم کے خلاف ریفرنڈم ہوگا۔بی این پی ضلع قلات کے جوائنٹ سیکرٹری میر صلاح الدین لانگو اور میر حفیظ مینگل نے کہا کہ بلوچستان کی سیاسی و جمہوری جدوجہد کو جاری رکھیں گے اور کسی بھی قربانی سے دریغ نہیں کریں گے۔ عوام احتجاج کو کامیاب کرنے کے لیے تعاون کریں۔اس موقع پر نیشنل پارٹی کے رہنما و ٹاون وائس چیئرمین چاکر خان محمد شہی، تحصیل صدر امیر حمزہ لانگو کونسلر سعید احمد محمد شہی، کونسلر منیر احمد محمد شہی سمیت دیگر موجود تھے۔