ریلوے اسٹیشن پر راتیں گزارنے والا وہ بھارتی اداکار جو اب کروڑوں کامالک نکلا

یہ بھارتی اداکار اترپردیش سے 2004میں ممبئی منتقل ہوئے، وہ 150بھارتی روپے میں قلم فروخت کیا کرتے تھے

پیر 8 ستمبر 2025 10:40

ممبئی (اُردو پوائنٹ اخبارتازہ ترین - این این آئی۔ 08 ستمبر2025ء)بھارت کی ٹی وی انڈسٹری میں ایک ایسا اداکار بھی ہے جس کی آمدنی نے سب کو چونکا دیا۔شوبز انڈسٹری میں دولت کی ریل پیل سب کو نظر آتی ہے لیکن اس کے پیچھے اداکاروں کی ایک طویل جدوجہد بھی شامل ہوتی ہے۔ بھارتی ٹی وی انڈسٹری کا بھی ایک ایسا اداکار ہے جس کے پاس رہنے کو گھر نہیں تھا، وہ دن بھر 95روپے بھارتی کی دیہاڑی لگاتا تھا اور ممبئی کے چھترپتی شیواجی ٹرمینل ریلوے اسٹیشن پر راتیں گزارتا تھا۔

میڈیا رپورٹس کے مطابق یہ بھارتی اداکار اترپردیش سے 2004میں ممبئی منتقل ہوئے، وہ 150بھارتی روپے میں قلم فروخت کیا کرتے تھے، یہی نہیں بطور بیک گرانڈ آرٹس 1500روپے فی شو کرتے تھے اور بعض دفعہ دن میں 95بھارتی روپے ہی کما پاتے تھے۔

(جاری ہے)

اداکار کا کہنا ہے کہ میں نے زیرو سے نہیں بلکہ مائنس سے شروع کیا، والد کو جھوٹ بولتا تھا میں کمپیوٹر کورس کر رہا ہوں اور میں تھیٹر میں بطور اداکار کام کرتا تھا۔

95بھارتی روپے کمانے والے یہ اداکار اب ممبئی میں 4 گھروں کا مالک ہے اور اس کی ماہانہ کمائی 24 لاکھ بھارتی روپے بنتی ہے۔یہ بھارتی اداکار یوگیش تریپاٹھی ہیں جن کے کئی ڈرامے ہٹ ہوچکے ہیں۔ یوگیش 2007 میں ایک اشتہار میں کام کی وجہ سے مشہور ہوئے اور انہیں انڈین ڈرامے ایف آئی آر میں کردار ملا جس کے بعد پھر انہوں نے پیچھے مڑ کر نہیں دیکھا۔

اداکار کو ڈرامہ سیریل بھابھی جی گھر پر ہیں کے کردار ہاپو سنگھ سے شہرت ملی اور پھر سب سے زیادہ کمانے والے ٹی وی اداکاروں کی فہرست میں آگئے، بھارتی میڈیا رپورٹس کے مطابق اداکار کی آمدن 3 کروڑ بھارتی روپے ہے اور ممبئی میں اپنے 4 گھر ہیں۔اس حوالے سے اداکار کا کہنا ہے کہ میں نے کبھی قرض نہیں لیا جو بھی حاصل کیا سخت محنت اور صبر سے حاصل کیا۔