Live Updates

ڈپٹی کمشنر سیالکوٹ کا سیلاب متاثرہ علاقہ بجوات کے موضع صدر پورہ کا دورہ

پیر 8 ستمبر 2025 16:52

سیالکوٹ (اُردو پوائنٹ اخبارتازہ ترین - اے پی پی۔ 08 ستمبر2025ء) ڈپٹی کمشنر سیالکوٹ صبا ءاصغر علی نے سیلاب سے شدید متاثرہ علاقہ بجوات کے موضع صدر پورہ کا دورہ کیا۔ اس موقع پر انہوں نے متاثرہ مکینوں سے ملاقات کی اور سیلاب سے ہونے والے نقصانات کا تفصیلی جائزہ لیا۔ انہوں نے مکینوں کی املاک، مال مویشی، جان و مال اور انفراسٹرکچر کو پہنچنے والے نقصان کا بغور معائنہ کیا اور متاثرہ افراد کی مشکلات کے حل کے لئے فوری اقدامات کرنے کی ہدایت کی۔

ڈپٹی کمشنر صباء اصغر علی نے غیر سرکاری فلاحی تنظیموں کے تعاون سے متاثرہ خاندانوں میں ایل پی جی گیس سلنڈر، چولہے، مچھر دانیاں اور راشن بیگز تقسیم کیے۔ انہوں نے کہا کہ مشکل کی اس گھڑی میں حکومت اور سول سوسائٹی دونوں کو مل کر کام کرنا ہوگا تاکہ متاثرہ افراد کو جلد از جلد ریلیف فراہم کیا جا سکے۔

(جاری ہے)

انہوں نے مزید کہا کہ وفاقی اور صوبائی حکومت کے تمام ادارے بشمول ڈسٹرکٹ ایڈمنسٹریشن سیالکوٹ دن رات بحالی اور ریلیف کے کاموں میں مصروف عمل ہیں۔

تاہم، اتنے بڑے پیمانے پر ہونے والے نقصانات کا ازالہ صرف حکومت کی بس کی بات نہیں، اس کے لئے فلاحی تنظیموں اور سول سوسائٹی کو بھی اپنا بھرپور کردار ادا کرنا ہوگا۔ڈپٹی کمشنر نے کہا کہ انہیں یہ دیکھ کر خوشی ہوئی ہے کہ فلاحی تنظیمیں جذبہ خدمت کے ساتھ انتظامیہ کے شانہ بشانہ کام کر رہی ہیں۔ انہوں نے کہا کہ یہی وقت ہے کہ ہم سب مل کر سیلاب سے متاثرہ بھائی بہنوں کی داد رسی کریں اور ان کے دکھوں کو بانٹیں۔