ژ* کوئٹہ ،زرعی ٹیوب ویلوں کو شمسی توانائی پر منتقل کرنے کے حوالے سے اجلاس

جمعرات 11 ستمبر 2025 22:45

ں* کوئٹہ (اُردو پوائنٹ اخبارتازہ ترین - آن لائن۔ 11 ستمبر2025ء)کمشنر کوئٹہ ڈویژن شاہزیب خان کاکڑ کی زیر صدارت زرعی ٹیوب ویلوں کو شمسی توانائی پر منتقل کرنے کے حوالے سے ایک اجلاس منعقد ہوا۔ اجلاس میں ڈپٹی کمشنر کوئٹہ مہراللہ بادینی، ڈائریکٹر ڈویلپمنٹ کوئٹہ ڈویژن ظہور احمد ،ایڈیشنل ڈپٹی کمشنر ریونیو کوئٹہ حافظ محمد طارق ،کیسکو حکام، زمیندار ایکشن کمیٹی کے مرکزی چیئرمین نصیر شاہوانی، حاجی عبد الرحمن بازئی سمیت دیگر متعلقہ افسران نے شرکت کی۔

اجلاس کو بریفنگ دیتے ہوئے بتایا گیا کہ وفاقی حکومت کی جانب سے بلوچستان کے ٹیوب ویلوں کو شمسی توانائی پر منتقل کرنے کے لیے ایک خصوصی پیکج متعارف کرایا گیا ہے، جس کا بنیادی مقصد زرعی صارفین کو بجلی کے بحران اور مسلسل لوڈشیڈنگ کے مسائل سے نجات دلانا اور بجلی کی مجموعی طلب میں نمایاں کمی لانا ہے۔

(جاری ہے)

مزید بتایا گیا کہ وفاقی حکومت کے معاہدے کے مطابق جن زمینداروں کے ٹیوب ویل شمسی توانائی پر منتقل ہو چکے ہیں، انہیں اپنے پرانے بجلی کے کنکشنز، تاریں اور ٹرانسفارمرز کیسکو کے حوالے کرنے ہیں۔

تاہم اس عمل میں بعض مشکلات اور رکاوٹیں سامنے آئی ہیں۔اس حوالے سے فیصلہ کیا گیا کہ کوئٹہ اور پشین اضلاع میں ایک خصوصی کمیٹی قائم کی گئی، جس میں متعلقہ ڈپٹی کمشنر، کیسکو حکام اور زمیندار ایکشن کمیٹی کے نمائندے شامل ہوں گے۔ یہ کمیٹی زمینداروں کے تعاون سے رکاوٹوں کو دور کرے گی اور پرانے کنکشنز، تاروں اور دیگر سامان کو مرحلہ وار کیسکو کے حوالے کرے گی۔

کمشنر شاہزیب خان کاکڑ نے کہا کہ زمینداروں کے لیے ٹیوب ویلوں کو شمسی توانائی پر منتقل کرنے کا عمل ایک انقلابی قدم ہے۔ اس سے نہ صرف بجلی کی طویل المدتی لوڈشیڈنگ کے مسائل کا خاتمہ ہوگا بلکہ زمینداروں کے زرعی اخراجات میں بھی نمایاں کمی آئے گی۔ انہوں نے مزید کہا کہ حکومت اس منصوبے پر شفاف اور تیز رفتار عمل درآمد کو یقینی بنائے گی تاکہ صوبے کے کسان شمسی توانائی کے فوائد سے بروقت مستفید ہو سکیں