ترشاوہ پودوں کی نئی پھوٹ پر لیف مائنر کاخدشہ،پودوں کی کمزور و ٹوٹی ہوئی شاخوں کو کٹر سے کاٹ کر باغات سے باہر پھینکنے کا مشورہ

جمعہ 12 ستمبر 2025 13:30

فیصل آباد (اُردو پوائنٹ اخبارتازہ ترین - اے پی پی۔ 12 ستمبر2025ء) شعبہ پلانٹ پروٹیکشن،پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت کی جانب سے باغبانوں کو آگاہ کیا گیا ہے کہ بارشوں کے بعد ترشاوہ پودوں پر نکلنے والی نئی پھوٹ پر لیف مائنر کے حملہ کا خدشہ ہو سکتاہے لہٰذا باغبان اس ضمن میں کسی غفلت کامظاہرہ نہ کریں اور پودوں کی کمزور و ٹوٹی ہوئی شاخوں کو کٹر سے کاٹ کر باغات سے باہر پھینک دیں۔

ڈپٹی ڈائریکٹرپلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباداسرارارشدنے بتایا کہ لیف مائنر کاحملہ بعد میں بڑھتے بڑھتے سٹرس کینکر کاسبب بھی بن سکتاہے جس سے پودے اور پھل تباہ ہوجاتے ہیں۔انہوں نے کہاکہ اگر کسی بھی باغ میں بارش کاپانی ترشاوہ پودوں کے اطراف میں 24 گھنٹے تک کھڑا رہے تو اس کی جڑوں میں ہوا کاگزر بند ہو جاتاہے جس سے وہ گلنا سڑنا شروع ہو جاتی ہیں۔

(جاری ہے)

انہوں نے کہاکہ باغبان کٹرسے کاٹی گئی شاخوں کے کٹ شدہ حصے پر بورڈ پیسٹ لگا دیں اور اگر تیز ہواؤں یاآندھی کے دوران پودا گر جائے تو اسے باغ سے نکال باہر کیاجائے تاہم ٹیڑھے ہوجانے والے پودوں کو خشک لکڑی کاسہارا دیا جا سکتا ہے۔ انہوں نے کہاکہ باغبان بارش کاپانی خشک ہونے اور وتر آنے پرکھادوں کااستعمال اور ہلکی گوڈی بھی کرسکتے ہیں۔