ڈینگی وائرس کے تدارک کیلئے محکمہ صحت اور دیگر لائن ڈیپارٹمنٹ فوری حفاظتی اقدامات عمل میں لائیں،ڈپٹی کمشنر

جمعہ 12 ستمبر 2025 14:20

مظفرآباد (اُردو پوائنٹ اخبارتازہ ترین - این این آئی۔ 12 ستمبر2025ء)ڈپٹی کمشنر مدثر فاروق کی زیر صدارت ڈینگی وائرس کے کیسز میں غیر معمولی اضافہ ہونے کی وجہ سے ڈینگی وائرس کے تدارک اور ضروری حفاظتی اقدامات عمل میں لائے جانے کے سلسلہ میں اجلاس منعقد ہوا۔ اجلاس میں محکمہ صحت، تعلیم، لوکل گورنمنٹ، تعمیرات عامہ پبلک ہیلتھ اور میونسپل کارپوریشن مظفرآباد کے ضلعی آفیسران نے شرکت کی۔

اجلاس میں ایڈیشنل ڈسٹرکٹ ہیلتھ آفیسر مظفرآباد (CDC) نے بریفنگ دیتے ہوئے کہا کہ حالیہ ایام میں ڈینگی وائرس کے کیسز میں غیر معمولی اضافہ ہوا ہے۔ جس کے سلسلہ میں اقدامات عمل میں لائے جا رہے ہیں۔ ڈپٹی کمشنر مظفرآباد نے کہا کہ ڈینگی وائرس کے تدارک کے لئے بالخصوص محکمہ صحت اور دیگر لائن ڈیپارٹمنٹ فوری طور پر ضروری حفاظتی اقدامات عمل میں لائیں۔

(جاری ہے)

محکمہ تعلیم تمام تعلیمی ادارہ جات (سرکاری و پرائیویٹ) میں بوقت اسمبلی طلبہ و طالبات کو ڈینگی وائرس سے بچاؤ کے سلسلہ میں آگاہی فراہم کریں۔ میونسپل کارپوریشن ہال اپر اڈہ میں میونسپل کارپوریشن و محکمہ صحت کے زیر اہتمام مورخہ16.09.2025 بروز منگل آگاہی سیشن کا انعقاد کیا جائے۔ جس میں محکمہ زراعت، میونسپل کارپوریشن، امور حیوانات اور شہری دفاع کے متعلقہ فیلڈ سٹاف کی حاضری کو یقینی بناتے ہوئے ڈینگی وائرس کے تدارک کے سلسلہ میں آگاہی فراہم کی جائے۔

سی ایم ایچ و ایمز مظفرآباد اور ADHO آفس کے علاوہ دیگر مقامات کا تعین کیا جائے جہاں پر ڈینگی وائرس کی سکریننگ ممکن ہو سکے۔ نیز محکمہ صحت عوام الناس کو ڈینگی وائرس سے بچاؤ کے لئے بذریعہ پمفلٹ (brochure) آگاہی فراہم کرے اور لاروے کی پہچان کے سلسلہ میں تصاویر شیئر کی جائیں۔تاکہ ڈینگی وائر س پر قابو پایا جا سکے۔