معروف بھارتی اداکارہ نے چلتی ٹرین سے چھلانگ لگا دی، زخمی حالت میں ہسپتال منتقل

ہفتہ 13 ستمبر 2025 14:20

ممبئی (اُردو پوائنٹ اخبارتازہ ترین - این این آئی۔ 13 ستمبر2025ء)بھارتی اداکارہ کرشمہ شرما ممبئی میں چلتی ٹرین سے چھلانگ لگانے کے بعد زخمی ہوگئیں۔بھارتی میڈیا کے مطابق اداکارہ کرشمہ شرما، جو راگنی ایم ایم ایس ریٹرنز اور پیار کا پنچنامہ جیسی مشہور فلموں میں اپنی اداکاری کیلئے جانی جاتی ہیں، ممبئی میں چلتی ٹرین سے چھلانگ لگانے کے بعد زخمی ہوگئیں۔

انہیںہسپتال منتقل کر دیا گیا ہے ۔ اداکارہ کرشمہ نے اپنی انسٹاگرام اسٹوری میں واقعے کی تفصیلات شیئر کرتے ہوئے مداحوں کو اپنی زخمی حالت کے بارے میں بتایا اور دعاؤں کی درخواست کی۔کرشمہ شرما نے اپنی انسٹاگرام اسٹوری میں لکھا کہ گزشتہ روز شوٹنگ کیلئے ممبئی کے علاقے چرچ گیٹ جانے کیلئے میں نے ٹرین سے سفر کرنے کا فیصلہ کیا اور میں ساڑھی پہن کر ٹرین پر چڑھی اور ٹرین تیز ہوگئی، مجھے احساس ہوا کہ میرے دوست ٹرین میں سوار نہیں ہو سکے اور وہ نیچے اسٹیشن پر رہ گئے جس کے بعد خوف کی وجہ سے میں نے ٹرین سے چھلانگ لگا دی اور اپنی کمر کے بل گری جس سے میرے سر پر شدید چوٹ آئی۔

(جاری ہے)

اداکارہ نے اسے اپنی زندگی کا انتہائی تکلیف دہ لمحہ قرار دیا۔کرشمہ نے بتایا کہ ان کے سر پر سوجن ہے، کمر میں درد ہے اور جسم پر خراشیں آئی ہیں۔ اداکارہ کے مطابق ڈاکٹروں نے ایم آر آئی کا مشورہ دیا ہے اور فی الحال انہیں ایک دن کیلئے زیرِ نگرانی رکھا گیا ہے۔واضح رہے کہ کرشمہ نے کئی مشہور بالی وڈ فلموں میں اداکاری کی ہے جن میں سپر 30، ایک ولن ریٹرنز ،پیار کا پنچنامہ وغیرہ شامل ہیں۔ اس کے علاوہ انہوں نے کیہ مشہور ٹی وی ڈراموں میں بھی کام کیا۔